راولپنڈی (کھوج نیوز) وزیراعلیٰ پنجاب مریم نواز کاراولپنڈی میں خطاب، مخالفین کی نیندیں حرام ہو گئیں، ن لیگ کے دور حکومت میں باتیں نہیں صرف کام ہوتا ہے اور ترقیاتی جال بچھائے جاتے ہیں۔
تفصیلات کے مطابق وزیراعلیٰ پنجاب مریم نواز کا کہنا تھاکہ راولپنڈی میں صفائی ستھرائی کا نظام دیکھ کر خوشی ہوئی، راولپنڈی میں ترقیاتی منصوبے جاری ہیں، عوام کو ٹرانسپورٹ کی بہترین سہولت فراہم کی جارہی ہے، ترقیاتی منصوبوں کی بروقت تکمیل یقینی بنائی جارہی ہے، میٹرو ہویا الیکٹرک بسیں، مسلم لیگ ن کا عوام کیلئے تحفہ ہے۔
وزیر اعلیٰ پنجاب نے کہا کہ 60 سال سے زائد عمر کے افراد اور خواتین کیلئے فری سروس ہے، الیکٹرک بسیں ماحولیاتی آلودگی پر قابو پانے میں معاون ثابت ہوں گی، 1100 الیکٹرک بسیں پنجاب کی سڑکوں پر چلیں گئی، پنجاب میں ڈیڑھ سال میں جو ترقی ہوئی اس کی مثال نہیں ملتی۔ انہوں نے کہا کہ مسلم لیگ ن عوام کی فلاح و بہبود پر توجہ دیتی ہے، ن لیگ نے پورے ملک میں ترقیاتی منصوبوں کے جال بچھائے، راولپنڈی میں دن رات ترقیاتی کام جاری ہیں، الیکٹرک بسوں کو چھوٹے شہروں سے لانچ کیا ہے، میرے ذہن میں کوئی تفریق نہیں، پنجاب میں بسنے والا ہر شہری میرے لیے برابر ہے۔
مریم نواز نے مزید کہا کہ الیکٹرک بس میں طلبہ کو مفت سفر کی سہولت فراہم کی جارہی ہے، پنجاب حکومت نے طلبہ کیلئے اسکالر شپ پروگرام شروع کیا، پنجاب حکومت تعلیم کے شعبے کی بہتری کیلئے اقدامات کر رہی ہے، اسکولوں میں نئے کمرے بنانے کیساتھ فرنیچر بھی فراہم کیا جارہا ہے۔ ان کا کہنا تھاکہ نئے گھروں کی تعمیر کا ہدف جلد پورا کریں گے، پنجاب کی حکومت صحت کے شعبے کی بہتری کیلیے اقدامات کر رہی ہے، پنجاب کے ہر شہر میں جدید اسپتال بنائیں گے، عوام کو علاج معالجے کی معیاری سہولتیں فراہم کی جارہی ہیں، پنجاب کے اسپتالوں میں مفت دوائیاں فراہم کی جارہی ہیں، پنجاب حکومت راشن کارڈ کے ذریعے مستحقین کی خدمت کر رہی ہے۔
مریم نواز کا کہنا تھاکہ مسلم لیگ کی حکومت جب بھی آتی ہے ملک ترقی کرتا ہے، مسلم لیگ ن نے ملک کو میگا منصوبے دیے ہیں، مسلم لیگ ن کا خیال آتے ہی ذہن میں موٹر ویز اور ترقیاتی منصوبے آتے ہیں ، مخالفین بھی ن لیگ کے کاموں کا اعتراف کرتے ہیں، آپ کے پاس سڑکوں کا جال ہے تو یہ بسیں چل رہی ہیں جہاں آپ کو جانا ہے بسوں کا کرایہ 20 روپے سے زیادہ نہیں۔ ان کا کہنا تھاکہ حکومت اسموگ کے خاتمے کیلئے کوشاں ہے، حکومتی اقدامات سے اسموگ پر قابو پایا، اسموگ کے خاتمے کیلیے جدید طریقہ کار اپنایا گیا، پنجاب میں سیوریج کے نظام کی بہتری کیلئے اقدامات کیے جارہے ہیں، عوام کو صاف پانی کی فراہمی ترجیح ہے۔
