لاہور(کھوج نیوز) وزیراعلیٰ پنجاب مریم نواز نے قبضہ مافیا سے ستائے شہریوں کے لئے بڑی خوشخبری کا اعلان کرتے ہوئے قبضہ مافیا کے خلاف شکنجہ تیار کرلیا ہے یہ اعلان اجلاس میں کیا گیا۔
تفصیلات کے مطابق وزیر اعلیٰ پنجاب مریم نواز کی سربراہی میں اجلاس ہوا جس میں پراپرٹی آرڈیننس کے مؤثرنفاذ پر وزیر اعلیٰ کو تفصیلی بریفنگ دی گئی۔ بتایا گیا کہ ایک ہزار 5 خاندانوں کو48 گھنٹوں میں زمین کی ملکیت کا حق واپس مل گیا ہے، اب پنجاب میں خواتین کے زمین کے مقدمات اولین ترجیح پر حل کیے جائیں گے۔
مریم نواز کا کہنا تھا کہ زمین کے مقدمات میں فیصلے پر فوری قبضہ دیا جائیگا،کوئی سفارش نہیں چلے گی۔ وزیر اعلیٰ پنجاب کا کہنا تھا کہ زمین کا اصل مالک جب تک قبضہ نہ لے فیصلہ ادھورا ہے، فیصلہ صرف کاغذ پر نہیں ہوگا۔ پنجاب کے ہرمرلے، ہرکنال اور ہرایکڑ پر صرف اور صرف اصل مالک کا ہی قبضہ ہوگا، شہری زمین یا پراپرٹی پر قبضے سے متعلق ڈی سی آفس میں درخواست دیں، دنوں میں فیصلہ ہوگا۔
