اسلام آباد(کھوج نیوز) وفاقی وزیر داخلہ محسن نقوی نے بڑا فیصلہ کرلیا ہے جس کے بعد ویزا ایجنٹوں کی شامت آگئی ہے، ویزا ایجنٹوں کیخلاف کریک ڈائون کا فیصلہ کیوں کیا گیا؟ تفصیل آگئی۔
تفصیلات کے مطابق وفاقی وزیر داخلہ محسن نقوی نے اسلام آباد ائیرپورٹ کا دورہ کیا اور 2 گھنٹے تک ائیرپورٹ پر امیگریشن پراسیس کا جائزہ لیا۔ وہ بیرون ممالک جانے والے مسافروں سے بھی ملے۔ان کا کہنا تھاکہ ضروری دستاویزات کے حامل کسی مسافر کو سفر سے نہ روکا جائے، جعلی دستاویزات یا دیگرذرائع سے بیرون ممالک جانے والے ملک کی بدنامی کاباعث بن رہے ہیں، بغیر تصدیق شدہ دستاویزات پر سفر کرنے کی اجازت نہیں دی جا سکتی۔
محسن نقوی نے ویزا ایجنٹوں کے خلاف کریک ڈاؤن کا حکم دیا اور کہا کہ ایجنٹ مافیا پیسوں کے لالچ میں لوگوں کے مستقبل سے کھیل رہا ہے، ملک کی بدنامی کا باعث بنتے ہیں، ملازمت کاجھانسہ دے کربیرون ممالک بھجوانے والے ایجنٹوں سے کوئی رعایت نہیں ہوگی۔ وزیر داخلہ نے مسافر کی 7 نومبر کو امیگریشن پرکم عملے کی شکایت کا نوٹس لیا اور انکوائری کا حکم دیتے ہوئے کہا کہ سی سی ٹی وی فوٹیج کے ذریعے تمام صورتحال کا جائزہ لیا جائے۔ انہوں نے مسافر سے کہا کہ آئندہ آپ کو اس حوالے سے شکایت کا موقع نہیں ملے گا۔
