محکمہ ریلوے کی 2025ء میں آمدنی کتنی رہی؟ ٹرینوں میں خفیہ کیمروں کی تنصیب کا فیصلہ
اسلام آباد(کھوج نیوز) محکمہ ریلوے کی 2025ء میں کتنی آمدنی رہی ؟ اس حوالے سے وزیر ریلوے حنیف عباسی نے سچائی سامنے رکھ دی جبکہ دوسری طرف ٹرینوں میں خفیہ کیمروں کی تنصیب کا فیصلہ کرلیا گیا ہے۔
تفصیلات کے مطابق وزیر ریلوے حنیف عباسی نے کا کہنا تھا کہ پاکستان ریلویز نے 2025ء میں 93 ارب روپے سے زائد ریونیو حاصل کیا، مالی سال 2025-26ء کی پہلی ششماہی میں 50 ارب روپے کی آمدن متوقع ہے جبکہ سال کے اختتام پر ریلوے تاریخ میں پہلی بار ایک کھرب آمدن کاسنگِ میل عبور کرلے گا۔
وزیر ریلوے نے کہا کہ ریلوے نے صرف 8 ماہ میں ٹرینوں کے 8 ریکس کو اپ گریڈ کیا، شالیمار، پاک بزنس، لاثانی، فیض احمد فیض ٹرینوں کو اپ گریڈ کیا گیا، دسمبر 2026 تک پاکستان ریلویز کی تمام ٹرینیں اپ گریڈ کر دیں گے۔حنیف عباسی نے کہا کہ راولپنڈی کو ملک کا پہلا اسمارٹ اسٹیشن بنا دیا ہے،کیمرے اور سکیورٹی سسٹم نصب ہے، 2026 میں دیگر بڑے اسٹیشنز بھی اسمارٹ بننے جا رہے ہیں، ٹرینوں میں بھی کیمرے لگانے کا فیصلہ کر لیا گیا ہے۔
حنیف عباسی نے کہا کہ لاہور، کراچی، راولپنڈی، فیصل آباد اسٹیشن اپ گریڈ کیے گئے، ریلوے کو ڈیجیٹائز کر دیا ہے، وزارت کا تمام کام ای فائلنگ پر منتقل کر دیا ہے، اب تمام بڑے اسٹیشنوں پر اے ٹی ایم، ڈی وی ایم اور پی او ایس مشینیں موجود ہیں۔ وزیر ریلوے نے کہا کہ سیفٹی ڈیپارٹمنٹ کو ڈائریکٹوریٹ میں تبدیل کر دیا گیا ہے جبکہ ریلوے حادثات میں بھی خاطر خواہ کمی آئی ہے، سیفٹی ڈائریکٹوریٹ بننے کے بعد حادثات کی شرح 0.09 سے 0.04 فیصد پر آگئی ہے، ڈائریکٹوریٹ بننے کے بعد ریلوے کو سیریس نوعیت کا کوئی حادثہ پیش نہیں آیا۔
انہوں نے کہا کہ لاہور، خانیوال، ملتان، کراچی اور راولپنڈی اسٹیشنوں کی صفائی کا انتظام آٹ سورس کیا، اب ان تمام اسٹیشنوں پر رات کے 12 بجے بھی صفائی ملتی ہے، اسٹیشنوں پرکھانے کا معیار بہتر کیا، فوڈ اتھارٹیز کسی بھی وقت چیک کر سکتی ہیں۔ وزیر ریلوے کے مطابق عملے کی حاضری بھی کمپیوٹرائزڈ کر دی گئی ہے، بغیر دفتر آئے کوئی تنخواہ نہیں لے سکتا، 2025 میں قابضین سے 394 ایکڑ اراضی واگزار کروائی گئی، دسمبر 2026 تک قابضین سے ریلوے کی تمام اراضی واگزار کروا لیں گے، تین ریلوے اسکول آٹ سورس کر دیے ہیں جبکہ دیگر اگلے 6 ماہ میں کر دیں گے، گیارہ مزید ٹرینیں آٹ سورس ہونے جا رہی ہیں۔
