بیجنگ (مانیٹرنگ ڈیسک) وزیر داخلہ محسن نقوی نے اپنے چینی ہم منصب وانگ ژاہونگ سے ملاقات کی، ملاقات میں کن امور پر تبادلہ خیال کیا گیا ؟ اس حوالے سے تمام تفصیلات سامنے آگئی ہیں۔
تفصیلات کے مطابق وزیر داخلہ محسن نقوی چین کی وزارت پبلک سکیورٹی کے ہیڈ کوارٹر پہنچے جہاں چینی وزیرداخلہ وانگ ژاو ہونگ نے وفد کے ہمراہ محسن نقوی کا پرتپاک خیرمقدم کیا۔ وزیرداخلہ محسن نقوی کی چینی ہم منصب وانگ ژاو ہونگ سے ساڑھے3 گھنٹے طویل ملاقات ہوئی جس میں دوطرفہ تعلقات ، انسداد دہشت گردی سے متعلق مشترکہ اقدامات پر تبادلہ خیال کیا گیا۔ ملاقات میں انسداد دہشتگردی، پولیس ٹریننگ ایکسچینج پروگرام، مشترکہ مفادات کے شعبوں میں اشتراک پر گفتگو ہوئی جبکہ مشترکہ ورکنگ گروپ کی ہر3 ماہ بعد میٹنگ پر اتفاق ہوا۔ وزرائے داخلہ کی سطح پر ہر سال ایک بار ملاقات ہوگی۔
دونوں وزرائے داخلہ نے دوطرفہ تعاون بڑھانے کیلئے کوآرڈینیشن بہتر بنانے پر زور دیا۔ چینی وزیرداخلہ نے چینی شہریوں اور منصوبوں کی حفاظت کے اقدامات پر اطمینان کا اظہار کیا اور وزیر داخلہ محسن نقوی اور ان کی ٹیم کا شکریہ ادا کیا۔ اس کے علاوہ چینی وزیرداخلہ نے انسداد دہشتگردی اور داخلی سکیورٹی پر پاکستان کی کوششوں کو سراہتے ہوئے کہا کہ دہشتگردی سے جنگ میں پاکستان کی قربانیوں کو قدر کی نگاہ سے دیکھتے ہیں۔ اس موقع پر محسن نقوی نے پاک چین پولیس اوراداروں میں تجربات اورمعلومات کے تبادلہ یقینی بنانے پر زور دیا۔
