ایاز صادق نے افواج پاکستان اور عدلیہ کیخلاف بولنے والوں کے منہ پر تالا لگا دیا
لاہور(کھوج نیوز) سپیکر قومی اسمبلی سردار ایاز صادق نے افواج پاکستان اور عدلیہ کیخلاف بولنے والوں کے منہ پر تالا لگا دیا ہے جس کے بعد پارلیمنٹ ہائوس میں نئی بحث کا آغاز ہوگیا ہے۔
تفصیلات کے مطابق سپیکر قومی اسمبلی سردار ایاز صادق کا کہنا تھا کہ میرا مشورہ یہ ہی ہے کہ پارلیمنٹ میں آئیں اور عوام کی خدمت کریں، احتجاج پر امن ہو تو کسی کو کوئی اعتراض نہیں ہوگا، اپوزیشن لیڈر ٹھیک بات کرتے رہیں گے تو انہیں فلور ملتا رہے گا۔ انہوں نے کہا کہ پارلیمنٹ میں افواج پاکستان اور عدلیہ کے خلاف کسی کو بات نہیں کرنے دوں گا، میری ذمہ داری ہے کہ کسی کو پاکستان مخالف بات نہ کرنے دوں۔
اسپیکر قومی اسمبلی کا کہنا تھا کہ دنیا کا کون سا ایسا ملک ہے جس سے آج پاکستان کی دوستی نہیں، مافیاز دنیا میں ہر جگہ ہوتے ہیں، حق اور سچ ان کا راستہ روکتے ہیں۔ ایاز صادق نے مزید کہا کہ وزیر اعظم سے مشاورت کرتا ہوں وہ مجھے روکتے نہیں ہیں، پاکستان کی خارجہ پالیسی کبھی اتنی اچھی نہیں تھی جتنی آج ہے، صرف ہمسائیہ ملک سے مسئلہ ہے جو ہمارے بچوں کی جانوں سے کھیلتا ہے۔
