حنا خان نے کیموتھراپی کے بعد پہلی شوٹنگ کا آغاز دھوم دھام سے کر دیا

لاہور(شوبزڈیسک)کینسر میں مبتلا بھارتی اداکارہ حنا خان نے کیمو تھراپی کے بعد اپنی پہلی شوٹنگ سے قبل میک اپ اور تیاری کی ویڈیو شئیر کردی ہے۔حناخان نے ویڈیو میں کہا کہ کیمو تھراپی کے پہلے سیشن کے بعد یہ میری پہلی شوٹنگ ہے۔ اس دوران ان کے جسم پر کیمو تھراپی کے دوران آنے والے زخم بھی دکھائی دے رہے ہیں اور وہ نروس بھی دکھائی دے رہی ہیں اوراپنے ٹانکوں کے نشان چھپانے کی کوشش کررہی ہیں۔حنا خان نے کہا کہ میں کیموتھراپی کے بعد اپنی پہلی شوٹنگ کے لیے پوری طرح تیارہوں۔ شو چلتے رہنا چاہئیے۔

انہوں نے کہا کہ ہم کینسر کے خلاف لڑیں گے اور کام کرتے رہیں گے۔ جیت ہماری ہوگی۔ زندگی میں اچھے دنوں کے ساتھ ساتھ برے دن بھی آتے ہیں۔ انہیں قبول کرنا چاہئیے اور ان سے سمجھوتہ کرکے معمول کی زندگی گزارنا چاہئیے۔ اداکارہ کا مزید کہنا تھا کہ میں ایک بار پھر اچھے دنوں کی توقع کررہی ہوں جب میں دوبارہ ہر وہ کام کرسکوں گی جو مجھے پسند ہے۔ میں کام کرتے رہنے چاہتی کیوںکہ مجھے اپنے کام سے محبت ہے۔ بھارتی اداکارہ حنا خان میں کچھ عرصہ قبل اسٹیج تھری کے بریسٹ کینسر کی تشخیص ہوئی تھی اور وہ زیرعلاج ہیں۔