کراچی ورلڈ کلچرفیسٹیول،مقامی تھیٹرفنکاروں کی شاندارپرفارمنس

کراچی(شوبز ڈیسک) ورلڈ کلچرفیسٹیول میں جہاں میوزک،ڈانس فائن آرٹ کے ملکی اوربین الاقوامی فنکارہیں تو وہیں مقامی تھیٹرفنکاروں کوبھی اپنےکھیل پیش کرنےکا موقع مل رہا ہے۔ آرٹس کونسل کراچی میں عالمی ثقافتی سرگرمی بھرپور چمک دھمک کے ساتھ جاری ہے۔ ثقافتی میلےمیں دنیا کےنامورڈانسر، تھیٹر،میوزک اورفائن آرٹ کےفنکارکراچی آرہے ہیں۔ 38 روزہ میلے کےتیرھویں دن حاضرین پاکستانی تھیٹرگروپ کے پلے’’clue‘‘ سے خوب محظوظ ہوئے۔

رنگ برنگی روشنیوں سے جگ مگ آرٹس کونسل کراچی میں ان دنوں ملکی اور بین الاقوامی فنکاروں کی آمدورفت کے سبب خوب چہل پہل ہے۔ ورلڈ کلچر فیسٹیول کےتیرھویں دن برطانوی تھیٹر ’’clue‘‘ کے ترجمہ پر مبنی کھیل نے حاضرین کی توجہ برقرار رکھی، قطاروں میں لگ کر پہلے ٹکٹ خریدے گئے اور پھر آڈیٹوریم ون تھیٹر فنکاروں کے برجستہ جملوں پر تالیوں سے گونج اٹھا۔

’کلیو‘ کے ہدایت کار فرحان عالم صدیقی نے کہا کہ دوسری زبان کے کھیل کو مقامی لب و لہجے میں ڈھالنا آسان نہیں لیکن تھیٹر فنکاروں نے اداکاری کا حق ادا کردیا۔ اسٹیج ڈرامے میں ایک ایسے میزبان کو مرکزی کردار بنایا گیا جو چھ مہمانوں کو بلیک میل کرتا ہے، تھیٹر پلے میں مجرموں کو سبق دیا گیا کہ چالاکی اور مکاری سے جرم چھپانا ممکن نہیں۔