ایک اور بھارتی اداکار نے بالی وڈ چھوڑنے کا فیصلہ کر لیا

ممبئی(شوبز ڈیسک)بالی وڈ اداکار سنی دیول نے حال ہی میں اپنی نئی فلم جات کے پروموشنل ایونٹ میں میڈیا سے گفتگو کرتے ہوئے کہا کہ یہ ڈھائی کلو کے ہاتھ کی طاقت پورا نارتھ دیکھ چکا ہے، اب ساوتھ دیکھے گا۔انہوں نے کہا کہ بالی وڈ پروڈیوسرز کو ساوتھ انڈین فلموں کے پروڈیوسرز سے سیکھنا چاہیے، جسے بالی وڈ کہا جاتا ہے اسے پہلے ہندی سنیما کے طور پر دیکھیں۔

سنی دیول نے کہا کہ ساؤتھ انڈین فلم پروڈیوسرز موضوع پر توجہ دیتے ہیں، ڈائریکٹر پر بھروسہ کرتے ہیں اور اس کے ویژن کو پورا کرنے کی ہر ممکن کوشش کرتے ہیں، ان کے لیے فلم کی پوری کہانی ہیرو ہوتا ہے اس لیے مجھے ان کے ساتھ کام کر کے بہت مزہ آیا۔انہوں نے کہا کہ میں نے فلم جات کے پروڈیوسر سے ایک اور فلم بنانے کو بھی کہا ہے۔

اداکار نے مزید کہا کہ ہو سکتا ہے میں مستقبل میں بالی وڈ چھوڑ کر ساوتھ انڈین فلم انڈسٹری کا ہی حصہ بن جاؤں۔

اس سے قبل اگست 2024 میں مسٹر پرفیکشنسٹ عامر خان بھی بالی وڈ چھوڑنے کی خواہش کا اظہار کر چکے ہیں۔