فاسٹ اینڈ فیوریس 11، پال واکر کی واپسی؟

لندن (شوبز ڈیسک) فاسٹ اینڈ فیوریس سیریز کی آخری فلم یعنی اس کا پارٹ 11 میں 2013ء میں وفات پا جانے والے پال واکر کی واپسی کے حوالے سے سچائی سامنے آگئی ہے۔

انٹرنیشنل میڈیا کے مطابق فاسٹ اینڈ فیوریس سیریز میں کام کرکے شہرت حاصل کرنے والے ہالی وڈ اداکار پال واکر 30 نومبر 2013 کو گاڑی کے حادثے میں 40 سال کی عمر میں وفات پا گئے تھے مگر وہ اس سیریز کی آخری فلم میں جلوہ گر ہوسکتے ہیں۔ یہ عندیہ فاسٹ اینڈ فیوریس سیریز کے مرکزی اداکار اور پروڈیوسر وِن ڈیزل نے دیا۔ ایک فیسٹیول میں مداحوں سے بات کرتے ہوئے وِن ڈیزل نے فاسٹ اینڈ فیوریس 11 کے بارے میں بات کی جو کہ اس سیریز کی آخری فلم بھی ہے۔ انہوں نے اشارہ دیا کہ سیریز کی آخری فلم میں پال واکر کے کردار کی واپسی ہوسکتی ہے۔

وِن ڈیزل نے بتایا کہ فاسٹ اینڈ فیوریس 11 اپریل2027ء کو ریلیز کی جائے گی۔ انہوں نے پال واکر کے کردار کے بارے میں بات کرتے ہوئے کہا کہ ‘اسٹوڈیو نے مجھ سے کہا کہ کیا ہم آخری فلم اپریل 2027 میں ریلیز کرسکتے ہیں؟’ انہوں نے مزید بتایا کہ میں نے جواب میں کہا کہ ایسا 3 شرائط پر ہوسکتا ہے، پہلی شرط تو یہ ہے کہ فرنچائز کو واپس لاس اینجلس میں لایا جائے، دوسری شرط یہ ہے کہ اسٹریٹ ریسنگ کو واپس لایا جائے، جبکہ تیسری شرط یہ ہے کہ ڈوم اور برائن او کونر کو پھر اکٹھا کیا جائے’۔