موسلادھار بارش’ میو اسپتال کی نئی ایمرجنسی پانی سے بھر گئی’ مریض خوار

لاہور(کھوج نیوز) صوبائی دارالحکومت میں ہونے والی آج کی موسلا دھار بارش سے میو اسپتال کے انتظامیہ کی نا اہلی کا پول کھل گیا، نئی ایمرجنسی پانی سے بھر گئی، علاج و معالجہ کیلئے آنے والے مریض خوار ہو گئے۔

تفصیلات کے مطابق ذرائع نے بتایا ہے کہ صوبائی دارالحکومت میں ہونے والی موسلا دھار بارش سے میو اسپتال کی نئی ایمرجنسی کی چھتیں ٹپک پڑیں جس کی وجہ سے ایمرجنسی میں پانی جمع ہوگیا جبکہ ایمرجنسی میں قائم آپریشن تھیٹرز میں بھی بارش کا پانی داخل ہوگیا جس کی وجہ سے اسپتال میں علاج و معالجہ کیلئے آئے مریضوں کو مشکلات کا سامنا کرنا پڑا یہاں تک کہ ری ویمپنگ کے دوران بننے والی ایمرجنسی لفٹ میں بھی پانی داخل ہوگیا۔ اس حوالہ سے اسپتال انتظامیہ کا کہنا تھا کہ بارش کا پانی سینٹرل وینٹی لیشن سے داخل ہوا اور نئی ایمرجنسی کے ناقص کام پر سی اینڈ ڈبلیو کو آگاہ کردیا گیا ہے جب کہ اسپتال کی ایمرجنسی سے پانی نکالنے کا کام کیا جارہا ہے۔