نادار قیدیوں کی فوری رہائی ،محکمہ داخلہ کا مخیر حضرات سے امداد کی اپیل
محکمہ داخلہ پنجاب کا کہنا ہے کہ ایسے نادار قیدی جو سزا پوری کر چکے ہیںلیکن جرمانے کی عدم ادائیگی کے باعث جیلوں میں قید ہیں
لاہور(کھوج نیوز) محکمہ داخلہ پنجاب نے اپنی سزا مکمل کرنے والے نادار قیدیوں کی فوری رہائی کیلئے ایک پیغام جاری کیا ہے۔ پیغام ایسے نادار قیدیوں بارے ہے جو سزا پوری کر چکے لیکن جرمانے کی عدم ادائیگی کے باعث جیلوں میں قید ہیں۔ ترجمان محکمہ داخلہ پنجاب کے مطابق پنجاب کی مختلف جیلوں میں 150 قیدی سزا مکمل ہونے کے باوجود دیت و جرمانے کی عدم ادائیگی کے باعث مقید ہیں۔ سزا مکمل کرنے والے ان قیدیوں کی رہائی کیلئے 10 کروڑ روپے کی ادائیگی ہونا باقی ہے۔
ترجمان محکمہ داخلہ کا کہنا ہے کہ مخیر حضرات زکوٰۃ کی مد میں قیدیوں کی دیت، ارش، دمان یا جرمانہ ادا کر سکتے ہیں جس کے بعد قیدیوں کو فوری طور پر عید سے قبل رہائی دلوائی جا سکتی ہے۔ مخیر حضرات کی بدولت یہ رمضان المبارک میں نادار قیدیوں کی رہائی اور اپنے پیاروں کیساتھ عید منانے کا نادر موقع ہے۔ ترجمان محکمہ داخلہ پنجاب نے بتایا کہ گزشتہ برس 17 کروڑ روپے کی ادائیگی سے 226 اسیران کی رہائی ممکن بنائی گئی تھی۔ قیدیوں کی رہائی کیلئے عطیات دینے کے خواہشمند افراد پنجاب جیل خانہ جات میں رابطہ کریں۔
انھوں نے کہا کہ شہریوں کی راہنمائی اور نادار قیدیوں کی رہائی کیلئے 24 گھنٹے ایکٹو ہیلپ لائن 0429200498 کا اجرا کیا گیا ہے۔ ہیلپ لائن پر متعلقہ اسیران، جرمانوں کی لسٹیں اور تفصیل طلب کی جاسکتی ہے۔ ترجمان محکمہ داخلہ پنجاب نے واضح کیا کہ پنجاب پریزن فانڈیشن کے اکاؤنٹ میں رقم جمع کروا کر قیدیوں کو عید کے موقع پر رہا کروایا جا سکتا ہے۔ ترجمان نے بتایا کہ شہری قیدی کی جانب سے جرمانے کی رقم بنک میں جمع کروا کر اس کا چالان فارم متعلقہ جیل میں جمع کروائیں۔ نادار اسیران کی رہائی کیلئے پنجاب پریزن فاؤنڈیشن کے بینک آف پنجاب اکانٹ نمبر PK37BPUN6510000418900018 میں رقم جمع کروائی جا سکتی ہے۔ ترجمان نے واضح کیا کہ مخیر حضرات قیدیوں کی رہائی کیلئے عطیات صرف پنجاب پریزن فانڈیشن کے مذکورہ اکاؤنٹ میں جمع کروائیں۔ پریزن فانڈیشن کے علاوہ کسی بھی ادارے، NGO یا فرد کو قیدیوں کی رہائی کیلئے عطیات ہرگز نہ دیں۔ کوئی جیل آفیسر یا اہلکار بھی دیت یا جرمانے کی ادائیگی کیلئے براہ راست رقم وصول کرنے کا مجاز نہیں ہے۔
