ہیلتھ کارڈ کا خاتمہ، غریب مریضوں کی دُہائی

لاہور (کھوج نیوز) پنجاب حکومت فیصلے کے بعد صوبائی دارالحکومت کے سرکاری اسپتالوں میں ہیلتھ کارڈ کی سہولت ختم کر دی گئی ہے جس کے بعد غریب مریضوں نے دُہائی دے دی ہے ۔

تفصیلات کے مطابق ہیلتھ کارڈ کے خاتمہ کے متعلق مراسلہ میں کہا گیا ہے کہ تمام سرکاری اسپتالوں میں یونیورسل ہیلتھ انشورنس بند کی جا رہی ہے، تمام سرکاری اسپتال 30 جون تک اپنے بقایاجات کی تفصیلات جمع کروا دیں ، 30 جون کے بعد اسٹیٹ لائف انشورنس بقایاجات ادا نہیں کرے گا۔ مراسلہ کے مطابق وزیر اعلی پنجاب کا اسپیشل انیشیٹیو موجودہ پالیسی کے مطابق جاری رہے گا۔

ہیلتھ کارڈ کی سہولت ختم کرنے سے متعلق پنجاب ہیلتھ انسٹیٹیوٹ مینجمنٹ کمپنی کے چیف ایگزیکٹیو افسر ڈاکٹر علی رزاق نے کہا کہ حکومت سرکاری اسپتالوں میں پہلے ہی مفت طبی سہولیات فراہم کر رہی ہے۔ انہوں نے واضح کیا کہ سرکاری اسپتالوں کے ڈاکٹر ہیلتھ کارڈز کے ذریعے آپریشن کے پیسے نہیں لے سکتے۔ انہوں نے مزید بتایاکہ ہیلتھ کارڈ اب صرف پرائیویٹ اسپتالوں میں استعمال کیا جا سکے گا جہاں مریضوں کو علاج کے لیے 50 فیصد رقم خود ادا کرنی ہوگی۔ ڈاکٹر علی رزاق کا کہنا تھا کہ سرکاری اسپتالوں میں ڈائیلیسز ، جگر کی پیوندکاری اور بچوں کے دل کے آپریشن جیسے اہم علاج بدستور جاری رہیں گے۔