انگلینڈ سےسیریز بےحد اہم،غلطیوں سےسیکھنا ہوگا،کپتان ٹیسٹ شان مسعود نےحقائق سامنے رکھ دئیے

کراچی(سپورٹس ڈیسک)پاکستان ٹیسٹ ٹیم کے کپتان شان مسعود کا کہنا ہے کہ انگلینڈ کے خلاف سیریز کا وقت پاکستان ٹیم کے لیے بہت اہم ہے۔ کراچی میں پریس کانفرنس کرتے ہوئے شان مسعود نے کہا کہ قومی ٹیم کو آگے لے کر جانا چاہتے ہیں۔انہوں نے کہا کہ بنگلا دیش کے خلاف کافی غلطیاں کیں جن سے سیکھنا ہو گا، شکست کے بعد تبدیلیاں کرنا آسان ہے لیکن آگے جانا ہے تو کھلاڑیوں کو بیک کرنا ہو گا، کھلاڑیوں کو شکست کا افسوس ہے، وہ اچھے نتائج دینے کے خواہاں ہیں۔شان مسعود کا کہنا ہے کہ شارٹ ٹرم اور لانگ ٹرم دونوں باتیں سامنے رکھنی ہوتی ہیں، رضوان کے بعد اگر کوئی وکٹ کیپر ہے تو وہ سرفراز ہے۔
قومی ٹیم کے کپتان نے کہا کہ چیمپئنز ون ڈے کپ میں اچھی تیاری ہوئی، جس میں فٹنس کا بھی علم ہوا ہے، جب ٹیم ہارتی ہے تو کپتان کے طور پر برا لگتا ہے، آئیڈیل آغاز نہیں ہوا، جب ہارتے ہیں تو احتساب ہوتا ہے۔ان کا مزید کہنا ہے کہ ریڈ بال کے لیے ذہنی اور جسمانی فٹنس بہتر کرنا ہو گی، ہماری فزیکل اور مینٹل کنڈیشن دنیا کی دوسری ٹیمز کی طرح ہونی چاہیے، اگر پاکستان کو بہتر ٹیسٹ ٹیم بننا ہے تو فزیکل اور مینٹل فٹنس کو بہت بہتر بنانا ہو گا۔شان مسعود نے یہ بھی کہا کہ عامر جمال انجری سے واپس آ رہے ہیں، کھلاڑیوں کی فٹنس کو دیکھتے ہوئے فی الحال ایک ٹیسٹ کے لیے ٹیم بنائی ہے، اسپورٹس میں پریشر ہوتا ہے، کسی بھی کھلاڑی کو ہارنا برادشت نہیں ہوتا۔