عاقب جاوید کی چھٹی، انگلش فاسٹ بائولر ڈیرن گف کو بڑا عہدہ سونپ دیا گیا

لاہور(سپورٹس ڈیسک) پاکستان کے سابق فاسٹ بائولر عاقب جاوید کی چھٹی، انگلش فاسٹ بائولر ڈیرن گف کو بڑا عہدہ سونپ دیا گیا ہے جس کے بعد شائقین کرکٹ حیران رہ گئے ہیں۔

تفصیلات کے مطابق لاہور قلندرز نے پی ایس ایل 10 کے لیے سابق انگلش فاسٹ بولر ڈیرن گف کو ہیڈ کوچ مقرر کر دیا۔ لاہور قلندرز نے پاکستان سپر لیگ کے لیے انگلینڈ کے لیجنڈری فاسٹ بالر ڈیرن گف کی بطورر ہیڈ کوچ خدمات حاصل کر لی ہیں اور ڈیرن گف بھی ایک بار پھر اپنے اس رول کو ادا کرنے کے لیے تیار ہیں۔ انھوں نے اس سے قبل بھی گلوبل سپر لیگ 2024 کے پہلے ایڈیشن میں لاہور قلندرز کے لیے ہیڈ کوچ کے طور پر کام کیا تھا۔ گلوبل سپر لیگ کے دوران لاہور قلندرز کی ٹیم نے ان کی نگرانی میں غیر معمولی کارکردگی کا مظاہرہ کرتے ہوئے ٹورنامنٹ کے افتتاحی ایڈیشن ہی میں فائنل کے لیے کوالیفائی کیا تھا۔ 54 سالہ ڈیرن گف نے کھیل کے میدان میں اپنی صلاحیتیوں کا لوہا منوایا ہے، انہوں نے 1994 سے 2006 تک انگلینڈ کی ٹیم کے لیے شاندار کارکردگی کا مظاہرہ کیا۔ انہوں نے 2020 میں انگلینڈ کے بالنگ کنسلٹنٹ کے طور پر خدمات دیں اور بعد میں یارکشائر میں کرکٹ کے منیجنگ ڈائریکٹر کے طور پربھی کام کیا۔