پی ایس ایل 10 کی انعامی رقم کتنی ہوگی؟ اعلان کر دیا گیا

لاہور(سپورٹس ڈیسک) پاکستان کرکٹ بورڈ (پی سی بی ) کی جانب سے پاکستان سپر لیگ (پی ایس ایل )سیزن 10کی انعامی رقم کتنی ہوگی؟ اس حوالے سے تمام اعدادو شمار سامنے آگئے ہیں۔

تفصیلات کے مطابق پاکستان کرکٹ بورڈ ذرائع نے بتایا ہے کہ ایچ بی ایل پی ایس ایل 10 جیتنے والی ٹیم کو5 لاکھ امریکی ڈالر (تقریبا ساڑھے 14 کروڑ روپے) انعام دیا جائے گا۔ رنز اپ ٹیم کو2 لاکھ امریکی ڈالر (تقریباً 5 کروڑ 61 لاکھ روپے) ملیں گے ۔ پی سی بی کے مطابق پی ایس ایل کے دسویں ایڈیشن کا آغاز کل راولپنڈی کرکٹ اسٹیڈیم میں شاندار افتتاحی تقریب سے ہوگا۔ کل پہلا میچ دفاعی چیمپئن اسلام آباد یونائیٹڈ اور لاہور قلندرز کے درمیان کھیلا جائیگا۔ 34 میچوں پر مشتمل یہ ٹورنامنٹ 6 ٹیموں کے درمیان 18 مئی تک جاری رہے گا۔ لاہور کے قذافی اسٹیڈیم میں 13 میچز ہوں گے، جن میں دونوں ایلیمینیٹرز اور فائنل شامل ہیں۔ راولپنڈی کرکٹ اسٹیڈیم 11 میچز کی میزبانی کرے گا، جن میں 13 مئی کو پہلا کوالیفائر بھی شامل ہے جبکہ کراچی کے نیشنل بینک اسٹیڈیم اور ملتان کرکٹ اسٹیڈیم میں پانچ، پانچ میچز ہوں گے۔ ٹورنامنٹ میں تین ڈبل ہیڈرز (ایک دن میں دو میچز) بھی شامل ہوں گے، جن میں سے دو ہفتہ کے دنوں اور ایک یوم مزدور (یکم مئی) کو کھیلے جائیں گے۔