گلوبل تائیکوانڈو، مسعود آفریدی نے عالمی چیمپئن بن کر ملک کا نام روشن کر دیا

خیبرپختونخوا (سپورٹس ڈیسک) گلوبل تائیکوانڈو عالمی چیمپئن شپ میں خیبرپختونخوا کے ضلع خیبر کی سنگلاخ وادیوں میں جنم لینے والے مسعودی آفریدی نے چیمپئن بن کر ملک کا نام روشن کر دیا ہے۔

تفصیلات کے مطابق سال 2025ء مسعود آفریدی کے خوابوں کی تعبیر لے کر آیا، دبئی میں ہونے والی گلوبل تائیکوانڈو ورلڈ چیمپئن شپ میں دنیا کے 25 سے زائد ممالک کے کھلاڑی شریک تھے جہاں مسعود آفریدی نے ایک طلائی (گولڈ) تمغہ اور مزید 3 میڈلز اپنے نام کر کے سب کو حیران کر دیا، یہی نہیں، اس سے پہلے وہ روس اور کرغزستان میں بھی پاکستان کے لیے گولڈ میڈل جیت چکے ہیں۔

مسعود آفریدی نے کہا کہ ان کا بچپن غیر معمولی حالات میں گزرا، کم عمری میں والد کا سایہ سر سے اٹھ گیا اور پھر قبائلی علاقوں میں شدت پسندی اور غربت کا عفریت اس کے خوابوں کے راستے میں دیوار بن کر کھڑا تھا لیکن مسعود نے ہار نہ مانی، اس نے تعلیم اور تربیت دونوں کا سفر جاری رکھا اور عملی زندگی میں قدم رکھتے ہی کچھ کر دکھانے کا عزم کرلیا۔

ان کا کہنا تھا کہ وہ جب 2023 میں کرغستان چیمپئن شپ کھیلنے کے لیے جارہے تھے تو کرغزستان کے سفارتخانے نے ان کا ویزہ 23 بار مسترد کیام 24 ویں بار جب اپلائی کیا تو ویزہ مل گیا اور چیمپئن شپ کی افتتاحی تقریب میں صرف 2 دن رہ گئے تھے، اخراجات کی کمی پورا کرنے کے لیے اپنا موبائل سیٹ تک فروخت کیا۔ مسعود آفریدی نے مزید کہا کہ سال 2023 میں جب پاکستان میں عالمی سطح پر تائیکوانڈو کا کوئی خاص نام و نشان نہ تھا، تب میں نے پاکستان میں پہلی بار گلوبل تائیکوانڈو فیڈریشن کا تعارف کروایا، اپنی مدد آپ کے تحت تربیت حاصل کی، مقامی سطح پر نوجوانوں کو تیار کیا اور پھر عالمی سطح کے مقابلوں میں شرکت کے خواب کو حقیقت کا روپ دیا اور آج بھی گلوبل تائیکوانڈو فیڈریشن پاکستان کا جنرل سیکرٹری ہوں۔