ایپل کی جانب سے کم قیمت آئی فون متعارف جائے گا

امریکہ ( مانیٹرنگ ڈیسک) ایپل کی جانب سے آئی فون 16 سیریز کا سستا ترین فون آنے والے مہینوں میں متعارف کرائے جانے کا امکان ہے۔تفصیلات کے مطابق ایپل کی جانب سے نئے کم قیمت آئی فون ایس ای کو آئی فون 16 ای کے نام سے متعارف کرائے جانے کا امکان ہے۔اس طرح یہ آئی فون 16 سیریز کا حصہ بن جائے گا اور ماضی کے ایس ای ماڈلز سے مختلف ہو جائے گا۔ آئی فون ایس ای 4 اس سیریز کے دیگر ماڈلز سے بالکل مختلف ہوگا اور اس کا ڈیزائن آئی فون 14 سے ملتا جلتا ہوگا۔

اس نئے ماڈل فون میں ہوم بٹن کو ہٹا دیا جائے گا جبکہ اسکرین پر فرنٹ کیمرا نوچ ڈیزائن میں دیا جائے گا۔ایک اور لیک میں بتایا گیا کہ فون کے اندر ایپل کا نیا اے 18 پراسیسر موجود ہوگا جسے آئی فون 16 کا حصہ بنایا گیا ہے۔اس اپ گریڈ سے فون کی کارکردگی بہتر ہوگی جبکہ اس میں آرٹی فیشل انٹیلی جنس فیچرز بھی صارفین کو دستیاب ہوں گے۔ اس نئے ماڈل میں 6.06 انچ کا او ایل ای ڈی ڈسپلے دیا جائے گا جبکہ اسے مارچ 2025 میں متعارف کرایا جاسکتا ہے۔