ٹک ٹاک ایپلی کیشن نے متعدد نئے فیچرز متعارف کرا دیے

لاہور(کھوج نیوز )دنیا بھر میں ٹک ٹاک ایک موبائل فرسٹ پلیٹ فارم کے طور پر جانا جاتا ہے،جو اس وقت بہت تیزی سے پوری دنیا میں مقبول بھی ہو رہا ہے ،ٹک ٹاک کو ایک ارب سے زائد لوگ تفریح اور تخلیقی صلاحیتوں کو سیکھنے کے لیے استعمال کرتے ہیں۔

ٹک ٹاک کی جانب سے جاری ایک بیان کے مطابق ڈیسک ٹاپ ورژن کو زیادہ بہتر بنانے کے لیے متعدد فیچرز پیش کیے گئے ہیں، صارفین کو ان فیچرز تک رسائی ترتیب وار دی جائے گی۔ ٹک ٹاک انتظامیہ کا کہنا ہے کہ ہم مسلسل اپنے صارفین کی بدلتی ہوئی ضروریات کو پورا کرنے اور ٹک ٹاک کے تجربے کو بہتر بنانے کے نئے طریقے تلاش کر رہے ہیں اس لیے ہم سمجھتے ہیں کہ کچھ مواقع پر ڈیسک ٹاپ پر ویڈیوز دیکھنا زیادہ آسان ہو سکتا ہے۔

بیان میں کہا گیا ہے کہ اب ڈیسک ٹاپ ورژن میں بھی ایکسپلور کا ٹیب شامل ہوگا جب کہ فار یو ٹیب کو بھی مزید بہتر کردیا گیا۔ اسی طرح ٹک ٹاک کے ڈیسک ٹاپ ورژن میں گیم کی لائیو اسٹریم بھی دیکھ سکیں گے جو کہ یوٹیوب پر مقبول ترین فیچر ہے۔

ابتدائی طور پر ٹک ٹاک پر صرف ایک منٹ دورانیے کی ویڈیوز اپ لوڈ کرنے کی اجازت ہوتی تھی لیکن بعد ازاں اس دورانیے کو بڑھا دیا گیا تھا اور اب ممکنہ طور پر جلد ہی تمام صارفین کو طویل ویڈیوز یعنی 60 منٹ دورانیے کی ویڈیوز بھی اپ لوڈ کرنے تک رسائی دیے جانے کا امکان ہے۔