سمارٹ فونز کے متبادل میٹا کی ڈیوائس کب متعارف کروائی جائیگی؟ تاریخ کا اعلان کر دیا گیا
برطانیہ (مانیٹرنگ ڈیسک) میٹا کی جانب سے طویل عرصے سے سمارٹ فونز کے متبال کے لئے سمارٹ ڈیوائس کب تک متعارف کروائی جائیگی؟ اس حوالے سے تاریخ کا اعلان کر دیا گیا ہے۔
انٹرنیشنل میڈیا کے مطابق میٹا کی جانب سے طویل عرصے سے اسمارٹ فونز کے متبادل کے لیے اگیومینٹڈ رئیلٹی (اے آر) ٹیکنالوجی پر مبنی اسمارٹ گلاسز کی تیاری پر کام کیا جا رہا ہے مگر یہ ڈیوائس 2027ء سے پہلے متعارف کرائے جانے کا امکان نہیں۔ ایک رپورٹ کے مطابق میٹا نے مکسڈ رئیلٹی گلاسز متعارف کرانے کا عمل 2027 تک ملتوی کر دیا ہے۔ فونیکس کے کوڈ نیم سے تیار کیے جانے والے اس مکسڈ رئیلٹی گلاسز کو پہلے 2026 کی دوسری ششماہی میں متعارف کرائے جانے کا امکان تھا مگر نئی رپورٹ میں بتایا گیا کہ اب گلاسز کو 2027 کی پہلی ششماہی میں پیش کیا جائے گا۔
میٹا کی جانب سے پہلے ہی ورچوئل رئیلٹی ہیڈ سیٹس اور رے بین اسمارٹ گلاسز فروخت کیے جا رہے ہیں مگر مکسڈ رئیلٹی گلاسز بہت زیادہ مختلف ہوں گے۔ رپورٹ میں بتایا گیا کہ مارک زکربرگ نے گلاسز کو متعارف کرانے میں تاخیر کا فیصلہ اس لیے کیا تاکہ وہ اسے زیادہ معیاری بنا سکیں۔ 2023ء میں بھی ایک رپورٹ میں بتایا گیا تھا کہ میٹا کی جانب سے پہلے اے آر گلاسز 2027 میں فروخت کے لیے پیش کیے جائیں گے۔ جولائی 2024ء میں میٹا کے چیف ایگزیکٹو مارک زکربرگ نے پیشگوئی کی تھی کہ مستقبل میں ہر فرد کی آنکھوں پر آرٹی فیشل انٹیلی جنس (اے آئی) ٹیکنالوجی سے لیس اسمارٹ گلاسز ہوں گے۔
