روہت شرما کابابراعظم کے ایک اور اعزاز پرقبضہ

لاہور(سپورٹس ڈیسک)بھارتی ٹیم کے کپتان روہت شرما نے ٹی20 انٹرنیشنلز میں بابراعظم کے ایک اور ریکارڈ پر قبضہ جمالیا۔ٹی20 ورلڈکپ کے دوسرے سیمی فائنل میں انگلینڈ کو شکست دیتے ہی بھارتی ٹیم کے کپتان روہت شرما نے بابراعظم سے ایک اور اعزاز چھین لیا، وہ ٹی20 انٹرنیشنل میں بطور کپتان 49 جیت کے ساتھ کامیاب ترین کیپٹن بن گئے۔روہت شرما نے مسلسل جیت کے تسلسل کو بھی 11 میچز تک بڑھادیا ہے۔اس سے پہلے روہت شرما نے شاندار بلے بازی کا مظاہرہ کرتے ہوئے 19 گیندوں پر 4 چوکوں اور 5 چھکوں کی مدد سے ٹی 20 ورلڈکپ 2024 کی تیز ترین نصف سینچری بھی بنائی تھی۔اور انہوں نے جنوبی افریقا کے کوئنٹن ڈی کاک اور ایرن جونز کا یہ اعزاز بھی چھین لیا تھا۔

قبل ازیں روہت شرما نے آسٹریلیا کیخلاف میچ میں قومی ٹیم کے کپتان بابراعظم کے ٹی20 انٹرنیشنلز میں سب سے زیادہ رنز بنانے کے سنگ میل عبور کیا تھا۔روہت شرما 150 ٹی20 انٹرنیشنل اننگز میں 4 ہزار 222 رنز بنانے والے پہلے بلیباز ہیں جبکہ بابراعظم 116 اننگز میں 4 ہزار 145 رنز بناکر دوسرے نمبر پر موجود ہیں۔