بال چمکانے پر پابندی کا معاملہ، پاکستانی بائولروں کیلئے بڑی خوشخبری آگئی

لاہور(سپورٹس ڈیسک) تھوک سے بال چمکانے پر پابندی کے معاملے پر پاکستانی بائولروں کے لئے بڑی خوشخبری آگئی ہے ، واضح رہے کہ اس پر پابندی 5برس قبل لگائی گئی تھی۔

تفصیلات کے مطابق انٹرنیشنل کرکٹ کونسل کی جانب سے کووڈ 19کے دوران بال چمکانے کے لیے تھوک پر پابندی لگائی تھی جس کے بعد گزشتہ 5 برس سے انٹرنیشنل کرکٹ میں فاسٹ بولرز بال تھوک کی بجائے پسینے سے چمکاتے ہیں تاہم اب بھارتی بورڈ نے آئی پی ایل کیلئے بال پر تھوک لگانے کی پابندی ختم کردی ہے۔

آل راؤنڈر فہیم اشرف نے کہا کہ کووڈ کی وجہ سے بال پر تھوک لگانے کی پابندی لگی، پسینے کی نسبت تھوک سے جلد اور زیادہ بال چمکتا ہے، کہا جا رہا ہے کہ پہلے جیسی بولنگ نہیں ہورہی اب تھوک کی اجازت ملتی ہے تو پہلے جیسی بولنگ ہوگی جیسے پہلے کرکٹ ہو رہی تھی ویسے ہونا شروع ہو جائے گی۔اس کے علاوہ نوجوان فاسٹ بولر عاکف جاوید نے کہا کہ کووڈ کی وجہ سے تھوک لگانا بند ہوا تو بولرز کو مشکل ہوئی، بال کے دونوں طرف پسینے لگانے سے ریورس ہونا کم ہوگیا تھا، اب اگر اجازت مل گئی تو بولرز کو مدد ملے گی اور ریورس سوئنگ ہو گی۔

پاکستان کرکٹ ٹیم کے فاسٹ بولر نسیم شاہ نے کہا کہ پابندی کی وجہ سے بال کو سب بولرز پسینے سے چمکاتے ہیں لیکن تھوک سے بال جلدی چمکتا ہے، اگر تھوک لگانے کی اجازت ملتی ہے تو ایک طرف سے اچھے طریقے سے بال چمکے گا لیکن اس کے باوجود بولنگ اچھی کرنا ہوگی کیوں کہ صرف بال چمکنے سے بہترین بولنگ نہیں ہو گی۔ نسیم شاہ کا کہنا تھا کہ اس پابندی کے ختم ہونے سے زیادہ فرق تو نہیں ہوگا لیکن ریورس کے لیے ایک طرف سے گیند زیادہ پرانا نہیں ہوگا۔