چہرے کے کھلے مسام بند کرنے کیلئے کونسے فیس ماسک استعمال کئے جائیں؟

لاہور(ہیلتھ ڈیسک)عمر کے ساتھ ساتھ چہرے کے مسام کھلنا عام سی بات ہے لیکن گرمیوں میں سورج کی تپش اور آلودگی بھی چہرے کے مسام کھلنے کی وجہ بنتی ہیں۔اکثر افراد کے چہروںپر کھلے مسام ہوتے ہیں جو ان کے چہرے کی خوبصورتی کو گھٹا دیتے ہیں۔تپش اور آلودگی سے چہرے کے مسام کھل جاتے ہیں جس کیلئے صفائی کا خیال رکھنا بہت ضروری ہے۔ہم آپ کو چند ایسے فیس ماسک کے بارے میں بتاتے ہیں جن کے استعمال سے آپ اپنی اس پریشانی سے چھٹکارا پا لیں گے۔

پہلے نمبر پر ملتانی مٹی آتی ہے ۔ملتانی مٹی کا ماسک بہت مفید ہے ۔اس کا استعمال صدیوں سے کیا جارہا ہے اور اسے جلد کو خوبصورت بنانے میں ایک اہم جز وسمجھا جاتا ہے۔اگر ملتانی مٹی میں عرق گلاب شامل کرکے اسے چہرے پر لگایا جائے تو یہ مسام کو کم کرنے میں مدد فراہم کرے گی۔ا سی طرح دوسرے نمبر کے ماسک میں ہم انڈے کی سفیدی اور لیموں کا رس استعمال کرتے ہیں۔انڈے کی سفیدی اور لیموں کا رس شامل کرکے اسے اچھی طرح مکس کریں اور پھر اپنے چہرے پر لگائیں، تو جلد کو فائدہ حاصل ہوگا۔انڈے کی سفیدی جلد کو لٹکنے سے بچاتی ہے جب کہ لیموں کے رس میں موجود وٹامن سی چہرے کی رنگت کو نکھارنے میں مدد دیتا ہے۔

تیسری قسم کا ماسک بنانے کیلئے ہم ٹماٹر کا استعمال کرتے ہیں۔قدرت نے ٹماٹر میں بہت سی افادیت چھپا رکھی ہے، ٹماٹر کا پیسٹ بنا کر اسے چہرے پر 15 سے 20 منٹ کیلئے رہنے دیں اور پھر پانی سے منہ دھو لیں، ٹماٹر بھی آپ کے چہرے کے مساموں کو بندکرنے میں مددگار ثابت ہوگا۔ چوتھی قسم کے ماسک میں آتے ہیں لیمو ںاور شہد۔ حسب ضرورت شہد میں 2 سے 3 قطرے لیموں کا عرق شامل کرکے چہرے پر 15 سے 20 منٹ کیلئے لگائیں، شہد آپ کی جلد کو موسچرائز کرتا ہے جب کہ لیموں جلد کو لٹکنے سے بچاتا ہے اور رنگ بھی نکھارتا ہے۔