کینو کھانے کے حیرت انگیز فوائد جو آپ کو صحت مند رکھتے ہیں

لاہور(کھوج نیوز) موسم سرما کے آتے ہی کینو بھی بازار میں دستیاب ہوتے ہیں ۔کینو موسم سرما کی سو غات سمجھا جاتا ہے ۔ہر پھل میں اللہ تعالی نے بہت سے فوائد رکھے ہیں اسی طر ح کینو میں بھی بہت سے فوائد ہیں ۔ماہرین کے مطابق روزانہ دو سے تین کینو کھانے سے آپ کے جسم کو مندرجہ ذیل فوائد حاصل ہوتے ہیں۔

کینو کھانے کا ایک بڑا فائدہ نظام ہاضمہ کو بہتر بنانا ہے۔کینو آسانی سے ہضم ہو جاتے ہیں جس کے باعث غذائی نالی پر دباو نہیں پڑتا۔اگر اکثر بدہضمی کے شکار رہتے ہیں تو ناشتے میں کینو کا جوس پینے سے نظام ہاضمہ کو مضبوط بنانے میں مدد مل سکتی ہے۔

سینے میں جلن یا تیزابیت کے لیے کینو کا استعمال بہت فائدہ مند ہے۔اس پھل میں ایسے منرلز موجود ہوتے ہیں جو معدے کی تیزابیت کو کم کرتے ہیں۔ایسا مانا جاتا ہے کہ روزانہ کینو کو کھانے سے سینے کی جلن کی شکایت میں کمی لانے میں مدد ملتی ہے۔

کینو میں وٹامن سی کی مقدار کافی زیادہ ہوتی ہے۔یہ وٹامن جسم میں اینٹی آکسائیڈنٹ کا کام کرتا ہے اور مدافعتی نظام کو مضبوط بناتا ہے جس سے موسمی نزلہ زکام سے بچنے میں مدد ملتی ہے۔اسی طرح وٹامن سی سے جِلد کے خلیات کو نقصان دہ مالیکیولز سے تحفظ ملتا ہے جبکہ جھریوں سے بچنے میں بھی مدد ملتی ہے۔وٹامن سی میٹابولزم کے افعال بھی بہتر کرتا ہے جس سے جسمانی وزن کو کنٹرول میں رکھنا ممکن ہوتا ہے۔

کینو کھانے سے صحت کے لیے نقصان دہ کولیسٹرول کی سطح کم ہوتی ہے جبکہ صحت کے لیے مفید کولیسٹرول کی سطح بڑھتی ہے۔نقصان دہ کولیسٹرول کی سطح بڑھنے سے امراض قلب بشمول ہارٹ اٹیک اور فالج کا خطرہ بڑھتا ہے۔