پشاورہائیکورٹ نے پی ٹی آئی کی جماعت کو بڑا جھٹکا دے دیا

پشاور(کھوج نیوز) پشاور ہائیکورٹ نے پاکستان تحریک انصاف (پی ٹی آئی) کو بڑا جھٹکا دیتے ہوئے ان کی عام انتخابات عدلیہ کی نگرانی میں کروانے کی درخواست خارج کر دی۔

تفصیلات کے مطابق پشاور ہائیکورٹ کے جسٹس شکیل احمد نے پی ٹی آئی کی درخواست پر پہلے سے محفوظ فیصلہ سناتے ہوئے تحریک انصاف کی درخواست خارج کر دی جس کا تحریری فیصلہ بعد میں جاری کر دیا جائے گا۔ خیال رہے کہ پی ٹی آئی نے پختونخوا میں انتخابات عدلیہ کی نگرانی میں کروانے کی استدعا کر رکھی تھی۔ پی ٹی آئی کے وکیل معظم علی خان نے عدالت میں استدعا کی تھی کہ تحریک انصاف کو الیکشن کے لیے لیول پلیئنگ فیلڈ مہیا نہیں کی جا رہی، ہمیں الیکشن کمیشن، آر اوز، ڈی آر اوز اور بیوروکریسی پر اعتماد نہیں ہے۔ پی ٹی آئی کے وکیل کا کہنا تھا موجودہ بیوروکریسی کے زیر انتظام ممکنہ طور پر شفاف الیکشن کا انعقاد ممکن نہیں اس لیے ہم چاہتے ہیں کہ جوڈیشل لا افسران کی نگرانی میں انتخابات کروائے جائے۔ پشاور ہائیکورٹ نے دلائل سننے کے بعد پی ٹی آئی کی درخواست پر فیصلہ محفوظ کر لیا تھا۔