غیرت کے نام پر قتل کا معاملہ، چیف جسٹس قاضی فائز عیسیٰ نے خواتین کیلئے آواز بلند کر دی

اسلام آباد(کھوج نیوز) غیرت کے نام پر قتل کے معاملہ پر چیف جسٹس پاکستان قاضی فائز عیسیٰ نے ایک تقریب سے خطاب کرتے ہوئے خواتین کے لئے آواز بلند کر دی ہے۔

تفصیلات کے مطابق چیف جسٹس پاکستان قاضی فائز عیسیٰ نے ایک تقریب سے خطاب کرتے ہوئے کہا کہ ہمارے ہاں خواتین کو مسما بلایا جاتا ہے، ہم اپنا مثبت کلچر بھول گئے ہیں، میں آئین پاکستان سے کچھ مثبت چیزیں بتانا چاہتا ہوں۔ انہوں نے کہا کہ آئین کا آرٹیکل 25 مدنظر رکھتے ہوئے خواتین کے لیے اقدام اٹھانے چاہئیں، مرد حضرات بھی شکایات کر رہے ہیں کہ خواتین کے لیے کوٹہ سسٹم ہوتا ہے، قرآن کا پہلا لفظ اقرا ہے جو مرد عورت میں تفریق نہیں کرتا، آئین کا آرٹیکل 25 بھی مساوی سلوک کی بات کرتا ہے۔

جسٹس فاضی فائز عیسیٰ کا کہنا تھا قانون شہادت کے آرٹیکل 122کے تحت ثبوت کا سارا بوجھ پراسکیوشن پر ہوتا ہے، اسلام میں خواتین کی کردار کشی قابل سزا جرم ہے، اسلام میں قذف کی سزا 80 کوڑے مارنا ہے، آج تک نہیں سنا کہ کسی کو قذف پر کوڑے مارے گئے ہوں، اسلام میں زنا ثابت کرنے کے لیے 4گواہوں کی شرط لازم ہے، چار گواہوں کی شرط پوری کیے بغیر عورت کو غیرت کے نام پر قتل کر دیا جاتا ہے۔

چیف جسٹس پاکستان آئین میں لکھا ہے خواتین کی نمائندگی ہر شعبے میں ہو گی، قومی اسمبلی میں صرف مخصوص نشستوں کے ذریعے ہی خواتین نہیں آتیں، خواتین الیکشن جیت کر بھی رکن پارلیمنٹ منتخب ہوتی ہیں۔جسٹس قاضی فائز عیسیٰ کا کہنا تھا کہ غیرت کے نام پر قتل کی اصطلاح غلط استعمال کی جاتی ہے، اصل معنی تکبر کی بنیاد پر قتل ہے اور اسلام میں تکبر کی سخت ممانعت ہے۔