وزیراعلیٰ خیبرپختونخوا کی صدارت میں گرینڈ جرگہ، وفاقی حکومت گھٹنے ٹیکنے پر مجبور

پشاور( کھوج نیوز) وزیراعلیٰ خیبرپختونخوا علی امین گنڈا پور کی زیر صدارت میں ہونے والے گرینڈ جرگہ میں وفاقی حکومت گھٹنے ٹیکنے پر مجبور ہو گئی جو پاکستان تحریک انصاف کیلئے بڑی خبر ہے۔

تفصیلات کے مطابق وزیراعلیٰ خیبرپختونخوا علی امین گنڈاپور کی میزبانی میں گرینڈ جرگہ ہوا جس میں تمام سیاسی پارٹیوں کے سربراہان اور نمائندگان نے شرکت کی۔ گورنر فیصل کریم کنڈی سمیت وفاقی وزیر داخلہ محسن نقوی بھی جرگہ میں شریک تھے۔ ذرائع کے مطابق گرینڈ جرگے میں وزیراعلی علی امین گنڈاپور نے کالعدم تنظیم کے ساتھ بات کرنے کا اختیار مانگ لیا۔ وزیراعلیٰ نے کہا کہ مذاکرات کے لیے دوسرے فریق کے ساتھ زمین پر بیٹھنے کو بھی تیار ہیں، اب تک جو کارروائی ہوئی اس پر ریاست کی وجہ سے خاموش رہے، مزید کچھ ہوگا تو ان سے پوچھا جائیگا۔ ذرائع کا کہنا ہے کہ وزیراعلیٰ نے یقین دہانی کرائی کہ وہ جرگہ بنائیں گے جس میں دیگر سیاسی جماعتوں کو بھی نمائندگی دی جائیگی، اس بات کو یقینی بنائیں گے کہ کالعدم تنظیم ریاست کے خلاف نہ جائے،کوشش ہوگی کہ کم سے کم وقت میں مسئلے کو حل کریں۔ ذرائع کے مطابق وفاقی وزیر داخلہ محسن نقوی نے کہا کہ آپ میزبانی کرلیں، مذاکرات پر ہمیں اعتراض نہیں۔ واضح رہے کہ جرگے میں ایمل ولی، پروفیسر ابراہیم ، محسن داوڑ، میاں افتخار، محمد علی شاہ باچا اور سکندر شیرپاؤ سمیت مختلف سیاسی جماعتوں کے رہنما شریک ہوئے ۔