عمران خان کو جیل میں کھانے کیلئے کیا دیا جاتا ہے؟ جیل انتظامیہ تمام تفصیلات بتا دیں

راولپنڈی (کھوج نیوز) راولپنڈی کی اڈیالہ جیل انتظامیہ نے پاکستان تحریک انصاف کے بانی عمران خان کو جیل میں کھانے کیلئے کیا دیا جاتا ہے؟ تمام کی تمام تفصیلات بتا دی ہیں۔

تفصیلات کے مطابق جیل انتظامیہ کا کہنا ہے کہ بانی پی ٹی آئی کو اپنا کھانا تیار کرنے کیلئے ایک قیدی کک دیا گیا ہے، ان کو ناشتہ میں کافی، چیہ سیڈ، چکندر کا جوس، دہی، بسکٹ اورکھجوریں بھی دی جاتی ہے۔جیل انتظامیہ کے مطابق بانی پی ٹی آئی کو جیل میں قانون کے مطابق بی کلاس کی تمام سہولتیں میسر ہیں اور ان کی خوراک، صحت، مطالعہ سمیت ورزش کا خاص خیال رکھا جاتا ہے، ان کے احاطے میں بجلی کی بلا تعطل فراہمی جاری ہے۔

جیل انتظامیہ کا کہنا ہے کہ بانی پی ٹی آئی کو پڑھنے کے لیے روزانہ اخبار دیا جاتا ہے، بانی پی ٹی آئی روزانہ دو گھنٹے ورزش کرتے ہیں اور ان سے متعلق پھیلائی گئی باتوں میں کوئی صداقت نہیں۔ جیل انتظامیہ نے بتایاکہ جیل کے ڈاکٹرز بانی پی ٹی آئی کا دن میں تین مرتبہ معائنہ کرتے ہیں، ان کو کسی قسم کی بیماری نہیں، وہ مکمل صحت مند ہیں، دو روز پہلے پمز کے ماہر ڈاکٹرز نے بانی پی ٹی آئی کا طبی معائنہ کیا، پمز کے ڈاکٹرز نے بانی پی ٹی آئی کے صحت مند ہونے کی رپورٹ دی۔ جیل انتظامیہ کے مطابق بانی پی ٹی آئی کو دوپہر کے کھانے میں کڑی پکوڑا، دیسی مرغی، دہی، چپاتی، سافٹ ڈرنک، سلاد، گرین ٹی اور مٹن بھی دیا جاتا ہے، بانی پی ٹی آئی کو شام کے کھانے میں دلیہ، ناریل پانی اور انگور وغیرہ دیے جاتے ہیں۔