سیکیورٹی فورسز نے پاکستان کو بڑی تباہی سے بچالیا

ٹانک ( کھوج نیوز )سیکیورٹی فورسز نے پاکستان کو بڑی تباہی سے بچا لیا ۔سیکیورٹی فورسز نے 17 اور 18 دسمبر کی درمیانی شب ضلع ٹانک میں خوارج کی موجودگی کی اطلاع پر آپریشن کیا، جس کے دوران انتہائی مطلوب خارجی سرغنہ علی رحمان عرف مولانا طحہ سواتی کو ہلاک کردیا گیا۔

کامیاب آپریشن کے دوران سکیورٹی فورسز نے 7 خارجیوں کو بھی ہلاک کیا۔ خارجی علی رحمان فتنہ الخوارج کے اہم سرغنہ ملا فضل اللہ کا قریبی ساتھی تھا۔سیکیورٹی ذرائع کے مطابق آئے روز خارجیوں کی پاکستان میں ہلاکت خوارج اور افغان طالبان کا مضبوط گٹھ جوڑ عیاں کرتی ہے۔

آپریشن کے دوران ایک خارجی نے گھر میں داخل ہو کر کمرے میں 2 بچوں کو یرغمال بنایا، خارجی نے دونوں بچوں کو ڈھال کے طور پر استعمال کرنے کی مذموم کوشش کی۔سیکیورٹی ذرائع کے مطابق سیکیورٹی فورسز کی کامیاب حکمت عملی سے دونوں بچے بحفاظت بازیاب ہوئے اور خارجی سرغنہ ہلاک ہوا، دہشتگردوں سے اسلحہ اور بارود سے بھری گاڑی ملی جو کسی بڑی دہشتگردی کیلئے استعمال ہونا تھا۔