رواں سال خیبر پختونخوا میں دہشت گردی کے کتنے واقعات ہوئے؟تفصیلات منظر عام پر آگئیں

پشاور( کھوج نیوز ) سی ٹی ڈی ( کانٹر ٹیررازم ڈپارٹمنٹ ( کی رپورٹ کے مطابق خیبر پختونخوا میں رواں سال دہشت گردی کے 670 واقعات رپورٹ ہوئے۔ دہشت گردی کے سب سے زیادہ واقعات ڈی آئی خان میں پیش آئے۔رپورٹ کے مطابق ڈی آئی خان میں 121، بنوں میں 116اور خیبر میں 80 ناخوشگوار واقعات رونما ہوئے۔

دہشت گردی کے خلاف کارروائیوں میں 212 شدت پسند مارے گئے۔ مارے جانے والوں میں سب سے زیادہ ہلاکتیں ڈی آئی خان میں ہوئیں جہاں 80 شدت پسند مارے گئے۔بنوں میں 41 اور خیبر میں 23 شدت پسندوں کو قتل کیا گیا۔

سی ٹی ڈی نے رواں سال شمالی وزیرستان میں 19 شدت پسند مارے ۔ رواں سال مختلف کارروائیوں کے دوران قانون نافذ کرنے والے اداروں کے 204 اہلکار شہید جبکہ 383 اہلکار زخمی ہوئے۔ خیبر پختونخوا میں رواں سال شدت پسندوں کے حملوں میں 174 عام شہری بھی شہید جبکہ 275 زخمی ہوئے۔