عوام کے لیے خو شخبری ،وزیر اعلی پنجاب کا صوبے میں نئی ہیلتھ سروسز متعارف کروانے کا فیصلہ
پنجاب حکومت نے صوبے میں مریم نواز کمیونٹی ہیلتھ سروسز متعارف کرانے کا فیصلہ کیا ہے
لاہور (کھوج نیوز )وزیر اعلی پنجاب مریم نواز کی زیر صدارت صوبے میں صحت کی سہولیات سے متعلق امور کا جائزہ اجلاس ہوا۔اجلاس میں پنجاب بھر میں مریم نواز کمیونٹی ہیلتھ سروسز متعارف کرانے کا فیصلہ کیا گیا، مریم نواز کمیونٹی ہیلتھ سروسز شعبہ صحت کے 19 اہم ٹاسک پورے کرے گی۔
پنجاب میں آؤٹ سروسنگ کے ذریعے 20 ہزار ہیلتھ انسپکٹرز کی خدمات حاصل کی جائیں گی، لیڈی ہیلتھ ورکرز پروگرام کو بھی مریم نواز کمیونٹی ہیلتھ سروسز سے منسلک کر دیا جائے گا جس کے تحت 39 ہزار لیڈی ہیلتھ ورکرز مریم نواز کمیونٹی ہیلتھ سروسز فورس کا حصہ ہوں گی۔کمیونٹی ہیلتھ سروسز کی ورک فورس تقریبا 60 ہزار سے زائد افراد پر مشتمل ہوگی، مریم نواز کمیونٹی ہیلتھ سروسز پولیو سمیت دیگر ویکسی نیشن کی ذمہ دار ہوگی، کمیونٹی ہیلتھ سروسز کے ذریعے مریضوں کا مستند ریکارڈ مرتب کیا جائیگا۔
اجلاس کو بتایا گیا کہ 93 فیصد مریض ہیلتھ سروسز سے متعلق اصلاحات سے مطمئن ہیں، مریم نواز کمیونٹی ہیلتھ سروسز سے میپنگ کا ٹاسک بھی پورا کیا جائیگا۔
وزیر اعلی پنجاب مریم نوازنے کمیونٹی ہیلتھ سروسز سے متعلق جامع پلان طلب کرتے ہوئے کمیونٹی ہیلتھ سروسز کو فعال کرنے کے لیے فوری اقدامات کا حکم دے دیا۔
