بجلی کی قیمتوں میں تاریخی کمی ،مسلم لیگ ن کے نائب صدرحمزہ شہباز کا ردعمل آگیا

لاہور(کھوج نیوز )وزیر اعظم شہباز شریف کی جانب سے بجلی کے نرخوں میں کمی کے اعلان پر سابق وزیراعلی پنجاب و نائب صدر مسلم لیگ ن حمزہ شہباز نے اظہار تشکرکیا۔

حمزہ شہباز کا کہنا ہے کہ اللہ تعالی کا شکر ہے کہ وزیراعظم شہباز شریف، نواز شریف اور ن لیگ کا ایک اور وعدہ تکمیل کی طرف گامزن ہے۔ انھوں نے کہا کہ معیشت کی بحالی اور عوام کو ریلیف کی فراہمی کے وعدے پر امید سحر کی کرن پڑ رہی ہے۔میاں حمزہ شہبا ز کا کہنا ہے کہ بجلی کی قیمتوں میں 7 روپے سے زائد کی بڑی کمی زراعت، صنعت اور تجارت کے لئے خوش آئند ہے۔ اس کمی کا سب سے بڑا ریلیف عام لوگوں کو پہنچا ہے۔نائب صدر مسلم لیگ ن کا کہنا تھا کہ ڈیفالٹ کرتی دگرگوں معیشت کو منجدھار سے کھینچ لانے کے پیچھے وزیراعظم اور انکی ٹیم کی دن رات انتھک محنت کارفرما ہے۔ الحمداللہ ملک کی ترقی کا سفر شروع ہوا چاہتا ہے جو صرف نیک نیتی، محنت اور قابلیت کی بدولت ممکن ہواہے۔