سی ایس ایس کرنے والے امیدواروں کے لیے خوشخبری ،عمر کی حد میں اضافہ

اسلام آباد(کھوج نیوز )انکم ٹیکس ترمیمی بل 2024 منظوری کے لیے قومی اسمبلی میں پیش کیا گیا تھا۔وفاقی وزیر پارلیمانی امور طارق فضل چوہدری نے بل کی شق 3، 4 اور 6 میں ترامیم پیش کیں جو کثرت رائے سے منظور کی گئیں۔ ایف بی آئی ایس ای ترمیمی بل 2024 بھی کثرے رائے سے منظور کر لیا گیا۔

قومی اسمبلی میں تحویل ملزمان ترمیمی بل 2025، عطائے شہریت ترمیمی بل 2024، سول سرونٹ ترمیمی بل 2025 اور انسداد اغراق و محصولات ترمیمی بل 2025 بھی منظور کر لیا گیا۔پاکستان شہریت ایکٹ میں مزید ترمیم سے متعلق دو بل قومی اسمبلی سے منظور کیے گئے۔ قومی اسمبلی سے منظور قوانین کے تحت پاکستان شہریت ایکٹ کی سیکشن 14اے اور سیکشن چار میں ترمیم کی گئی۔

دوران اجلاس قومی اسمبلی رولز معطل ہوگئے اور حکومت سپلمنٹری ایجنڈا لے آئی۔علی موسی گیلانی نے ٹریڈ آرگنائزیشن ترمیمی بل 2025 قومی اسمبلی میں پیش کیا جسے منظور کر لیا گیا۔قومی اسمبلی رول 288 میں ترمیم کثرت رائے سے منظور کر لی گئی۔

پیپلز پارٹی کی شرمیلا فاروقی کی جانب سے پیش کیا گیا چائلڈ میرج پر پابندی سے متعلق بل بھی قومی اسمبلی سے منظور ہوگیا۔سی ایس ایس امتحانات میں عمر کی حد 5 سال بڑھانے کی قرارداد قومی اسمبلی سے منظور کرلی گئی۔ قرارداد مسلم لیگ ن کی رکن اسمبلی نوشین افتخار نے پیش کی۔

قرارداد کے مطابق کسی بھی امیدوار کو پانچ مرتبہ مقابلے کے امتحان میں حصہ لینے کی اجازت دی جائے۔ سی ایس ایس امتحانات میں حصہ لینے والے امیدوار کی زیادہ سے زیا دہ عمر کی حد 30 کے بجائے35 سال کی جائے۔قومی اسمبلی اجلاس پیر کی شام پانچ بجے تک ملتوی کر دیا گیا۔