لاہور(کھوج نیوز) وزیراعلیٰ پنجاب مریم نواز نے صوبے کے کم آمدن افراد کے لئے بڑی خوشخبری کا اعلان کر دیا ہے، یہ خوشخبری کون سی ہے؟ اس حوالے سے تمام تر تفصیلات سامنے آگئی ہیں۔
تفصیلات کے مطابق کے مطابق وزیر اعلیٰ پنجاب مریم نواز کی ہدایت پر صوبے کے کم آمدن افراد کیلئے گھروں کی فراہمی کے ایک اور منصوبے کا آغاز کیا گیا ہے، جس کے تحت سرکاری اراضی پر 37 ہزار سے زائد اڑھائی سے 3 مرلہ گھروں کی تعمیر ممکن ہوگی۔ بتایا گیا ہے کہ وزیر ہاؤسنگ بلال یاسین کی زیر صدارت اجلاس ہوا، جس میں پنجاب افورڈایبل ہاؤسنگ کے پراجیک ڈائریکٹر عمران علی سلطان نے بریفنگ دی، انہوں نے بتایا کہ ورلڈ بینک کے اشتراک سے پنجاب کے 25 اضلاع میں 35 مقامات پر گھروں کی تعمیر کا شروع کی جائے گی، جن میں لاہور، گوجرانوالہ، فیصل آباد، ملتان، سیالکوٹ، لیہ ، خانیوال سمیت 25 اضلاع شامل ہیں۔
وزیر ہاؤسنگ پنجاب بلال یاسین کا کہنا ہے کہ مستحق خاندانوں کو اپنے گھروں کی فراہمی وزیر اعلیٰ پنجاب مریم نواز کی اولین ترجیحات میں ہے، افورڈایبل ہاؤسنگ پراجیکٹ میں کم سے کم اقساط کی رقم کا تعین کیا جائے گا، منصوبے کے تحت سرکاری اراضی پر اگلے 3 ماہ میں پرائیویٹ سیکٹر کے تعاون سے تعمیراتی کاموں کا آغاز ہوگا،5 سال کی مدت میں اپنی چھت اپنا گھر پروگرام کے تحت بھی 5 لاکھ سے زائد خاندانوں کے گھروں کی تعمیر ہوگی۔
