امبانی کی شادی میں ایشوریہ کہاں’ابھیشک کہاں’طلاق کی خبریں گرم

لاہور(شوبزڈیسک)بالی وڈ اداکار ابھیشک بچن کی طلاق کی پوسٹ پر ردعمل نے ایک بار پھر فلمی دنیا کی مقبول جوڑی کے درمیان علیحدگی کی خبروں کو ہوا دے دی ہے۔مکیش امبانی کے بیٹے اننت امبانی کی شادی میں ابھیشک کا اہلیہ اور بیٹی کے بجائے والدین کیساتھ فوٹوشوٹ ایک بار پھر موضوع بحث بن گیا تاہم تقریب سے وائرل کچھ تصویروں نے مداحوں کو خوش بھی کیا جن میں ان کو اکٹھے دیکھا گیا۔جس کے بعد اب ابھیشک نے سوشل میڈیا پر بھارتی صحافی کی جانب سے شیئر طلاق سے متعلق پوسٹ پر لائیک کیا جس نے ایک بار پھر ابھیشک اور ایشوریہ کو ساتھ دیکھنے کے خواہش مند مداحوں کومایوس کردیا ہے۔

ابھیشیک کی لائیک کی گئی پوسٹ میں درج تھا کہ جب محبت آسان نہ لگنے لگے ، طلاق کسی کے لیے کبھی بھی آسان نہیں ہوتی، کون خوشی سے زندگی گزارنے کا خواب نہیں دیکھتا لیکن اس کے باوجود زندگی کبھی بھی ویسی نہیں ہوتی جیسی ہم امید کرتے ہیں لیکن جب لوگ اپنی زندگی کا ایک خاص حصہ ایک ساتھ گزارنے کے دہائیوں بعد الگ ہوجاتے ہیں تو وہ کیسے برداشت کرتے ہیں؟

پوسٹ میں مزید درج تھا کہ کیا چیز لوگوں کو رشتوں کو ختم کرنے پر مجبور کرتی ہے۔کیا وہ چیلنجز ہیں جو معاشرے میں grey divorce کو فروغ دے رہے ہیں؟
(grey divorceکی اصطلاح ایسے جوڑوں کیلئے استعمال ہوتی ہے جو 50 سال بعد ایک دوسرے سے علیحدگی اختیار کرتے ہیں)۔ صحافی کی پوسٹ کو ابھیشک بچن کی جانب سے لائیک کیا گیا جس کے بعد ایک بار پھر مداح جوڑی کے درمیان ہونے والی علیحدگی کے خوف سے مایوس ہیں۔

گزشتہ کئی ماہ سے بھارتی میڈیا اور سوشل میڈیا پر ایشوریا رائے اور ابھیشک بچن کی طلاق کی افواہیں سرگرم ہیں، اس سے قبل بھی اس قسم کی غیر مصدقہ خبریں سامنے آچکی ہیں۔اس سے قبل ایشوریا رائے کے بچن ہائوس چھوڑنے کی خبریں بھی سامنے آئی تھیں اور امیتابھ بچن نے اپنی بہو کو سوشل میڈیا سے اَن فالو بھی کردیا تھا۔ابھیشک بچن اور ایشوریا رائے کی شادی 2007 میں ہوئی تھی اوران کے گھربیٹی آرادھیا کی پیدائش 2011میں ہوئی تھی۔