بھارتی اداکار پرجان لیواحملہ ؟ کون تھا وہ شخص اور اداکار سے کیا دشمنی تھی؟
بھارت کے مشہور ٹی وی شو کرائم پٹرول کے اداکار راگھو تیواری پر ایک شخص نے چھری اور لوہے کے ڈنڈے سے حملہ کردیا
ممبئی(مانیٹرنگ ڈیسک) میڈیا تفصیلات کے مطابق اداکار ممبئی میں اپنے دوست کی گاڑی سے اتر کر سڑک عبور کر رہے تھے کہ اس دوران وہ موٹرسائیکل سوار سے ٹکرا گئے، جس کے فوری بعد انہوں نے اس شخص سے معافی مانگی لیکن اس شخص نے اداکار کو گالی دینا شروع کردی۔ اداکار نے اس واقعے کی تفصیل بتاتے ہوئے کہا کہ میں نے اس شخص سے پوچھا کہ وہ مجھے کیوں گالی دے رہا ہے جس کے بعد وہ شخص غصے میں اپنی موٹرسائیکل سے نیچے اترا اور مجھ پر 2 مرتبہ چھری سے حملہ کیا پھر اس نے مجھے پیٹ میں لات ماری جس کی وجہ سے میں زمین پر گر گیا۔
راگھو تیواری نے کہا کہ ملزم نے شراب کی بوتل اور موٹرسائیکل سے لوہے کی روڈ بھی مجھے مارنے کے لیے نکالی۔انہوں نے کہا کہ ملزم نے مجھے تھپڑ بھی مارا جس کے بعد میں نے اپنے دفاع میں لکڑی کا ایک ٹکڑا اٹھا کر اس شخص کے ہاتھ پر مارا جس سے بوتل اس کے ہاتھ سے گر گئی، اس شخص نے مزید غصے میں لوہے کی روڈ سے میرے سر پر 2 بار حملہ کیا۔
راگھو تیواری کے مطابق اس واقعے کے بعد ملزم وہاں سے فرار ہوگیا جس کے بعد ان کے دوست علاج کے لیے انہیں اسپتال لے گئے۔ اداکار کا مزید کہنا تھا کہ اس واقعے کی شکایت پولیس کو بتانے کی کوشش بھی کی لیکن پولیس نے میری بات نہیں سنی۔
