لاہور(کھوج نیوز) ”پارٹنر ان پیس ” کے سلسلے میں پنجاب کی جانب سے غیر معمولی مراسلہ جاری، اس مراسلہ میں کیا تحریر کیا گیا؟ اس حوالے سے تمام تر تفصیلات منظر عام پر آگئی ہیں۔
تفصیلات کے مطابق محکمہ داخلہ پنجاب کی جانب سے جاری کیے گئے مراسلے میں محکمہ داخلہ نے صوبے بھر میں تمام اداروں اور عوام کو پارٹنر ان پیس بننے کی دعوت دی ہے اور سیف پنجاب وژن کو عملی جامہ پہنانے کے لیے اتحاد، ذمہ داری، عوامی شراکت داری کو ضروری قرار دیا۔ مراسلے میں کہا گیا ہے کہ کسی فرد یا تنظیم کو کسی صورت تشدد، قانون شکنی یا ایسے کسی اقدام کی ہرگز اجازت نہیں دی جائے گی۔ اس کے علاوہ محکمہ داخلہ نے سکیورٹی کے حوالے سے تجاویز کے لیے واٹس ایپ نمبر 03114340000 بھی جاری کردیا جس پر شہری امن عامہ میں بہتری کے لیے تجاویز واٹس ایپ نمبر پر تحریری طور پر دے سکتے ہیں۔
مراسلے میں یہ بھی کہا گیا ہے کہ تعلیمی اداروں، اسپتالوں، عوامی اور مذہبی مقامات پر سخت نگرانی یقینی بنائی جائے، بروقت سکیورٹی آڈٹ سے ممکنہ واقعات کی پیشگی روک تھام ممکن ہے، تاجر برادری، مارکیٹ ایسوسی ایشنز اور صنعتی ادارے قوانین پر عملدرآمد میں معاونت کریں، امن کے عظیم تر مقصد کے حصول کے لیے تمام ادارے باہمی رابطہ اور ٹھوس تعاون یقینی بنائیں۔ مراسلے میں مزید کہا گیا ہے کہ قیام امن کے لیے پنجاب سیف سٹیز کے جدید نظام سے مثر نگرانی یقینی بنائی جائے، پرامن اور ہم آہنگ معاشرے کے قیام کے لیے قوانین پر مکمل عمل درآمد ناگزیر ہے۔ مراسلے کے مطابق کسی جرم، مجرم کی نشاندہی، مشکوک سرگرمی یا ایمرجنسی میں 15 پر رابطہ کریں، محکمہ داخلہ نے قانون نافذ کرنے والے تمام اداروں کو مسلسل الرٹ رہنے کی ہدایت کی ہے۔
