قذافی اسٹیڈیم نئے اور خوبصورت روپ میں دنیا کے سامنے
ْقذافی اسٹیڈیم لاہو ر کا کام آخری مراحل میں داخل ہو گیا ہے ،آئندہ دس روز میں اسٹیڈیم پی سی بی کے حوالے کر دیا جائے گا
لاہور(سپورٹس ڈیسک ) چیمپئنز ٹرافی کے لیے قذافی اسٹیڈیم کو نئے انداز سے تیار کیا گیا ہے۔پی سی بی چیئرمین محسن نقوی کی ذاتی کوششوں اور گہری دلچسپی کے سبب اسٹیڈیم کا تعمیراتی کام اور تزئین اور آرائش پانچ ماہ میں پایہ تکمیل کو پہنچ رہا ہے ۔پی سی بی چیرمین محسن نقوی اسٹیڈیم کے تعمیراتی کام کی بروقت تکمیل کی خود نگرانی کرتے رہے ہیں۔قذافی اسٹیڈیم محسن نقوی کے اس وژن کی عکاسی کرتا ہے کہ یہ دنیا کے دیگر عالمی معیار کے اسٹیڈیمز کی طرح نظر آئے۔اسٹیڈیم کو پیشہ ورانہ انداز میں ڈیزائن کیا گیا ہے تاکہ شائقین ،کھلاڑی اور آفیشلز کھیل کے ایک ایک لمحے سے بھرپور انداز میں لطف اٹھاسکیں۔
اسٹیڈ یم میں کرسیوں کی تنصیب کا کام آخری مرحلے میں ہے۔ایک ڈیجیٹل اسکرین کا کام مکمل کر دیا گیا ہے اور دوسری بھی چند روز میں مکمل ہوجائے گی۔ فلڈ لائٹس ٹاورز اب نئے بلب کے ساتھ روشن ہونگے، جو شائقین کے لیے ایک خوبصورت نظارہ ہوگا۔
حکام کا کہنا ہے کہ آئندہ دس روز میں تمام کام مکمل ہوجانے کے بعد اسٹڈیم پی سی بی انتظامیہ کے حوالے کردیا جائے گا تاکہ سہ فریقی سیریز کی تیاریاں کی جاسکیں۔چیمپئنز ٹرافی سے قبل قذافی اسٹیڈیم پاکستان نیوزی لینڈ اور جنوبی افریقہ کی سہ فریقی سیریز کے میچوں کی میزبانی بھی کرے گا۔قذافی اسٹیڈیم میں چیمپئنز ٹرافی کا پہلا میچ 22 فروری کو کرکٹ کے دو روایتی حریفوں انگلینڈ اور آسٹریلیا کے درمیان کھیلا جائے گا۔
