ایشین انڈر 16والی بال چیمپئن شپ، قومی ٹیم نے تاریخ بدل کر رکھ دی

تھائی لینڈ (سپورٹس ڈیسک) ایشین انڈر 16والی بال چیمپئن شپ میں قومی نے تاریخ بدل کر رکھ دی ہے کیونکہ دفاعی چیمپئن ایران کو شکست دے کر فائنل میں کامیابی حاصل کرلی ہے۔

انٹرنیشنل میڈیا کے مطابق تھائی لینڈ کے شہر ناکھون پاتھوم میں ہونیوالی چیمپئن شپ کے فائنل میں پاکستان اور ایران کے درمیان سنسنی خیز مقابلہ ہوا۔ دونوں ٹیمیں کسی بھی موقع پر ہمت ہارنے کو تیار نہ تھیں تاہم آخر میں پاکستان ٹیم بہتر ٹیم ثابت ہوئی ۔ فائنل کے ابتدائی دو سیٹس ایران نے 25-22 اور 25-21 کے اسکور سے جیتے۔ تیسرے سیٹ میں ایک موقع پر پاکستان کو 17-11 سے برتری تھی لیکن ایران نے بھرپور مزاحمت کی 24-24 پر مقابلہ برابر کیا، دونوں ٹیموں نے ایک دوسرے کے میچ پوائنٹس روکے اور بالآخر پاکستان نے تیسرا سیٹ 30-28 سے جیت کر میچ میں کم بیک کیا۔

چوتھے سیٹ میں پاکستان نے ابتدا ہی سے ایران پر دبا رکھا، ایران کی ٹیم نے مزاحمت کی لیکن پاکستان چوتھا سیٹ 25-21 سے جیت کر مقابلہ برابر کرنے میں کامیاب رہا۔ فیصلہ کن سیٹ میں پاکستانی پلیئرز نے ایران کو قریب نہ آنے دیا اور 15-10 کے اسکور سے پانچواں سیٹ جیت کر تین ۔ دو کی فتح مکمل کی اور کورٹ پر سجدہ ریز ہوئے۔ پاکستان نے دو گھنٹے سات منٹ جاری رہنے والے میچ میں مضبوط اعصاب کا مظاہرہ کرتے ہوئے 22-25، 21-25، 30-28، 25-21 اور 15-10 سے کامیابی حاصل کی ۔ پاکستان کی جانب سے محمد جنید اور فیضان اللہ نے شاندار کھیل پیش کیا۔ جنید نے 24 اٹیک پوائنٹس سمیت 28 پوائنٹس بنائے، فیضان اللہ نے 18 اٹیک اور چار بلاک پوائنٹس سمیت 22 پوائنٹس لیے۔