آئی فون 15 خریدنے والوں کی شکایت پر ایپل انتظامیہ کا جواب بھی آگیا

برطانیہ(مانیٹرنگ ڈیسک) آئی فون 15 خریدنے والوں نے اس کے سافٹ ویئر سمیت فون کے گرم ہونے کی شکایت کی تھی جس پر ایپل انتظامیہ نے ایکشن لیتے ہوئے مسائل جلد دور کرنے کی یقین دہانی کرا دی۔

انٹرنیشنل میڈیا کے مطابق ایپل کا نیا آئی فون 15 فروخت کے لیے پیش کر دیا گیا ہے جسے حاصل کرنے کے لیے دنیا بھر کے مختلف ممالک میں رش بھی دیکھا گیا لیکن آئی فون 15 لینے والوں نے اس کے سافٹ ویئر سمیت فون کے گرم ہونے کی شکایت کی جس پر ایپل کی انتظامیہ کا مؤقف بھی سامنے آیا ہے۔ میڈیا رپورٹس کے مطابق ایپل کی جانب سے آئی فون میں مسائل کا الزام انسٹا گرام اور اوبر جیسی مشہور ایپس میں موجود بگ پر لگایا گیا ہے اورکہا گیا ہے کہ ان بڑی ایپس کی وجہ سے فون گرم ہو رہا ہے۔ کمپنی کی جانب سے کہا گیا ہے کہ وہ iOS17 سسٹم کے اپ ڈیٹ پر کام کر رہے ہیں جو آئی فون 15 کو درپیش مسائل سے چھٹکارا دلائے گا جس کی وجہ سے فون سسٹم کو اوور لوڈ کر رہا ہے۔ میڈیا رپورٹس کے مطابق میٹا پلیٹ فارمز کی ملکیت والے انسٹاگرام نے اس ہفتے کے شروع میں اپنی سوشل میڈیا ایپ میں ترمیم کی تھی تاکہ اسے جدید ترین آئی فون آپریٹنگ سسٹم پر ڈیوائس کو گرم کرنے سے روکا جا سکے جبکہ اوبر سمیت دیگر گیمز کی ایپس کی انتظامیہ ایپس کو اپڈیٹ کرنے پر کام کر رہی ہیں۔