ونڈوز کمپیوٹرزکی ونڈوز میں ٹیکنالوجی کا نقص، ائیرپورٹس،ٹی وی نشریات متاثر
ونڈوز کمپیوٹرز پر بلیو اسکرن آف ڈیتھ ایرر نظر آ رہا ہے اور وہ ری بوٹ بھی نہیں ہو رہے
لاہور(ٹیکنالوجی ڈیسک)دنیا کے متعدد ممالک میں بینکوں، فضائی کمپنیوں، ٹیلی کمیونیکیشن کمپنیوں، ٹیلی ویژن (ٹی وی) اور ریڈیو نشریات اور سپر مارکیٹس کے سسٹمز مائیکرو سافٹ کے ونڈوز ورک اسٹیشنز میں ہونے والی ایک خامی کے نتیجے میں آف لائن ہوگئے۔سائبر سکیورٹی کمپنی کراڈ اسٹرائیک کے مطابق امریکا، برطانیہ، نیوزی لینڈ، بھارت اور دیگر متعدد ممالک میں ونڈوز ورک اسٹیشنز پر اسکرین آف ڈیتھ ایرر کی وجہ سے آف لائن ہوگئے۔برطانیہ میں اسکائی نیوز چینل 19 جولائی کی صبح آف ائیر ہوگیا جبکہ آسٹریلیا کے میلبرن ائیرپورٹ کی جانب سے ایکس پر بیان جاری کیا گیا کہ عالمی ٹیکنالوجی مسئلے کے باعث کچھ فضائی کمپنیوں کا چیک ان کا طریقہ کار متاثر ہوا ہے تو مسافروں کو چیک ان کرنے میں کچھ تاخیر ہو سکتی ہے۔
برطانیہ کی ایک ٹرین کمپنی کی جانب سے سے بھی آئی ٹی مسائل کا حوالہ دیتے ہوئے مسافروں کو ٹرینوں کا شیڈول متاثر ہونے کا انتباہ دیا گیا۔امریکا، آسٹریلیا اور کئی ممالک میں مائیکرو سافٹ کے سسٹم میں آنے والی اس خامی کے باعث پروازوں کو منسوخ کیا گیا ہے۔نیدرلینڈز میں بھی ائیرپورٹ آپریشنز اس کے باعث متاثر ہوئے ہیں۔برطانیہ کیایڈنبرا ائیرپورٹ پر خودکار بورڈنگ پاس اسکینرز غیرفعال ہونے کے باعث مسافروں کی مینوئل چیکنگ کی جا رہی ہے۔
چیک ری پبلک کے دارالحکومت پراگ میں بھی پروازوں کی روانگی اس تکنیکی خرابی کے باعث متاثر ہوئی۔بھارتی دارالحکومت نئی دلی اور ممبئی ائیرپورٹ پر بھی پروازوں کی آمدورفت متاثر ہوئی۔تکنیکی خرابی کے باعث اسپین کے مختلف ائیرپورٹس،ترکش ائیرلائن، آسٹریلین میڈیا اور بینکنگ آپریشنز متاثرہوچکے ہیں۔کراڈ اسٹرائیک کے مطابق دنیا کے متعدد حصوں میں بلیو اسکرین آف ڈیتھ ایرر کا سامنا صارفین کو ہوا ہے اور اس کی وجہ ابھی واضح نہیں۔مگر بظاہر یہ مسئلہ کراڈ اسٹرئیک کی ہی ایک اپ ڈیٹ کے نتیجے میں ہوا ہے جس کے باعث ونڈوز کمپیوٹرز پر بلیو اسکرن آف ڈیتھ ایرر نظر آ رہا ہے اور وہ ری بوٹ بھی نہیں ہو رہے۔کراڈ اسٹرئیک کے ماہرین کی جانب سے اس مسئلے کو حل کرنے کے لیے کام کیا جا رہا ہے۔دوسری جانب مائیکرو سافٹ نے اس حوالے سے ابھی تک کوئی بیان جاری نہیں کیا مگر اس کے سروس اسٹیٹس پیج پر کہا جا رہا ہے کہ سب کچھ ٹھیک ہے۔البتہ کمپنی نے دن کے آغاز پر کہا تھا کہ صارفین مائیکرو سافٹ 365 تک رسائی حاصل نہیں کر سکیں گے۔
