ٹیسلا سعودی عرب میں کیا کرنے جا رہی ہے ؟ٹیسلا کا بڑا اعلان

ریاض (مانیٹرنگ ڈیسک) معروف امریکی الیکٹرک کار ساز کمپنی ٹیسلا نے سعودی عرب میں اپنی مصنوعات متعارف کروانے کا باضابطہ اعلان کر دیا ہے۔ یہ اقدام مشرق وسطی میں کمپنی کی توسیع کی حکمت عملی کا حصہ ہے، جس کے تحت سعودی صارفین کو جدید الیکٹرک گاڑیاں اور دیگر مصنوعات دستیاب ہوں گی۔

ٹیسلا کے سی ای او ایلون مسک نے ایک بیان میں کہا کہ سعودی عرب کی تیزی سے ترقی کرتی ہوئی معیشت اور جدید ٹیکنالوجی کی طرف بڑھتے ہوئے رجحان کو مدنظر رکھتے ہوئے یہ فیصلہ کیا گیا ہے۔ کمپنی کا ماننا ہے کہ سعودی مارکیٹ میں الیکٹرک گاڑیوں کی طلب میں نمایاں اضافہ ہو رہا ہے، جس کے پیش نظر مقامی سطح پر سیلز اور سروس سینٹرز قائم کیے جائیں گے۔

ذرائع کے مطابق، ابتدائی طور پر ماڈل 3 اور ماڈل Y گاڑیاں سعودی صارفین کے لیے دستیاب ہوں گی، جبکہ مستقبل میں دیگر ماڈلز کی بھی دستیابی ممکن ہو سکتی ہے۔ ٹیسلا کے اس اقدام سے نہ صرف مقامی صارفین کو جدید اور ماحول دوست ٹیکنالوجی میسر آئے گی بلکہ سعودی حکومت کے 2030 وژن کے اہداف کے حصول میں بھی مدد ملے گی، جو قابل تجدید توانائی اور ماحولیاتی تحفظ پر زور دیتا ہے۔

ماہرین کے مطابق، سعودی عرب میں ٹیسلا کی آمد سے برقی گاڑیوں کے شعبے میں مسابقت بڑھے گی اور مقامی آٹو انڈسٹری میں بھی نئی جدت دیکھنے کوملے گی۔