برطانیہ (مانیٹرنگ ڈیسک) جی میل کے ان باکس کو کیسے صاف رکھا جاسکتا ہے؟ اس حوالے سے ایک نیا فیچر سامنے آگیا ہے اور اس فیچر کو کیسے استعمال کیا جاسکتا ہے؟ تمام تر تفصیلات سامنے آگئی ہیں۔
انٹرنیشنل میڈیا کے مطابق درحقیقت متعدد ویب سائٹس پر وزٹ کرتے ہوئے صارفین اپنے ای میل کا اندراج کر دیتے ہیں اور پھر ان سائٹس کی ای میلز موصول ہوتی رہتی ہیں مگر اچھی بات یہ ہے کہ جی میل میں اس حوالے سے ایک فیچر موجود ہے جو ان باکس کو ایسی غیر ضروری ای میلز سے نجات دلانے میں مدد فراہم کرتا ہے۔ یہ فیچر کافی عرصے سے جی میل صارفین کو دستیاب ہے مگر بیشتر کو اس کا علم نہیں یا وہ اس پر توجہ ہی نہیں دیتے۔ منیج سبسکرپشن نامی اس فیچر کے ذریعے آپ ای میل سبسکرپشنز کو ایک ہی جگہ دیکھ کر ان سے نجات حاصل کرسکتے ہیں۔ اس فیچر سے قبل جی میل پر نیوز لیٹر کو ان سبسکرائب کرنے کا آپشن موجود تھا مگر ایسا ون بائی ون کرنا پڑتا تھا۔
آئی فون یا اینڈرائیڈ فون پر جی میل ایپ کو اوپن کریں اور بائیں جانب مینیو بار پر کلک کرکے نیچے منیج سبسکرپشنز آپشن پر کلک کریں۔ اسی طرح ویب برازر پر جی میل اوپن کرکے بائیں جانب مور آپشن پر کلک کرکے منیج سبسکرپشنز میں جائیں۔ یہ فیچر ابھی ویب برازر پر تو تمام صارفین کو دستیاب ہے جبکہ موبائل ایپ میں محدود ممالک میں اسے استعمال کیا جاسکتا ہے۔ منیج سبسکرپشنز سیکشن میں جانے کے بعد آپ کے سامنے ان تمام نیوز لیٹرز کی لسٹ آجائے گی جو آپ سبسکرائب کر چکے ہیں۔
