فن لینڈ (مانیٹرنگ ڈیسک) مچھلی کے تیل کے کیپسول صحت کے لئے مفید ہو بھی سکتے ہیں یا نہیں؟ اس حوالے سے فن لینڈ کی ہیلنسکی یورنیورسٹی میں ہونیوالی طبی تحقیق نے چونکا دیا ہے۔
انٹرنیشنل میڈیا کے مطابق فن لینڈ کی ہیلنسکی یونیورسٹی کی اس تحقیق میں مچھلی کے تیل کے کیپسولز میں موجود اومیگا 3 فیٹی ایسڈ سے صحت مند افراد پر مرتب ہونے والے اثرات کی جانچ پڑتال کی گئی تھی۔ تحقیق میں 38 صحت مند افراد کو شامل کیا گیا اور انہیں مچھلی کے تیل میں پائے جانے والے اومیگا 3 فیٹی ایسڈ کی قسم eicosapentaenoic acid(ای پی اے) کی زیادہ خوراک کا استعمال کرایا گیا۔ ای پی اے کے استعمال سے قبل، اس کے دوران اور بعد میں خون کے نمونے اکٹھے کیے گئے تاکہ مشاہدہ کیا جاسکے کہ جسم کس طرح فیٹی ایسڈ پر ردعمل ظاہر کرتا ہے۔
محققین نے بتایا کہ نمونوں سے یہ تو واضح ہوا ہے کہ ہر فرد پر ای پی اے سے اثرات مرتب ہوتے ہیں، مگر ہر فرد کا جسم مختلف انداز سے کام کرتا ہے ۔ انہوں نے تصدیق کی کہ جسم میں ای پی اے مثر انداز سے جذب ہوتا ہے اور خون میں اس کی مقدار میں تیزی سے اضافہ ہوتا ہے مگر جیسے ہی سپلیمنٹ کا استعمال روک دیا جاتا ہے، تو اس کی سطح میں ڈرامائی کمی آتی ہے۔
درحقیقت کم مقدار میں ای پی اے کے ستعمال کرنے والے افراد میں تو یہ سطح نہ ہونے کے برابر رہ جاتی ہے۔ آسان الفاظ میں مچھلی کے تیل کے کیپسول سے صحت کو فائدہ ہوتا ہے مگر یہ اسی وقت تک برقرار رہتا ہے جب تک آپ اس کا استعمال جاری رکھتے ہیں، جیسے ہی آپ اسے چھوڑتے ہیں، تمام فوائد ختم ہو جاتے ہیں۔ محققین نے تسلیم کیا کہ تحقیق کسی حد تک محدود تھی کیونکہ اس کا دورانیہ طویل نہیں تھا اور طویل العمیاد اثرات کا جائزہ نہیں لیا گیا۔
