نیتن یاہو کی ٹرمپ سے ملاقات ،ایران کے لیے خطرے کی گھنٹی

واشنگٹن(مانیٹرنگ ڈیسک)امریکی صدر ٹرمپ سے ملاقات کے لیے واشنگٹن روانہ ہونے سے قبل اسرائیلی وزیر اعظم نیتن یاہو نے کہا کہ وہ صدر ٹرمپ کے ساتھ ایک انتہائی اہم ملاقات میں شرکت کے لیے واشنگٹن روانہ ہوں گے۔ نیتن یاہو کا کہنا تھا کہ یہ حقیقت ہے کہ کسی غیر ملکی رہ نما کے ساتھ ان کے عہدہ سنبھالنے کے بعد یہ پہلی ملاقات ہو گی۔ یہ اسرائیل اور امریکہ کے درمیان اتحاد کی مضبوطی کی علامت ہوگی۔ یہ ملاقات ہمارے درمیان تعلقات کی مضبوطی کی نشاندہی کرتی ہے۔ اس نے اسرائیل اور اس خطے کے لیے پہلے ہی عظیم چیزیں پیدا کی ہیں۔ ٹرمپ کے ساتھ تعلقات اسرائیل اور چار عرب ممالک کے درمیان تاریخی امن معاہدوں کا باعث بھی بنے ہیں۔

نیتن یاہو نے کہا کہ مجھے یقین ہے کہ ملاقاتوں میں ہم ان اہم مسائل پر بھی بات کریں گے جو ہمیں درپیش ہیں – حماس پر فتح حاصل کرنے، تمام قیدیوں کی واپسی، اور ایرانی محور کے تمام حامیوں سے نمٹنے پر بات کی جائے گی۔اس کے علاوہ ایران کے معاملے پر بھی تفصیلی بات کی جائے کیونکہ ایران صرف اسرائیل ہی نہیں بلکہ پورے مشرق وسطی اور پوری دنیا کی سلامتی کے لیے خطرہ ہے ۔ہم نے جنگ کے دوران جو اقدامات کیے اس نے پہلے ہی مشرق وسطی کا چہرہ بدل دیا ہے اور مجھے یقین ہے کہ صدر ٹرمپ کے ساتھ کام کر کے ہم اسے اور بھی بدل سکتے ہیں۔