غزہ میں مسلسل گولہ باری اور باردو سے ماحولیاتی بحران نے بھی سر اٹھا لیا

غزہ (مانیٹرنگ ڈیسک) غزہ میں امداد کی بندش سے جہاں سنگین غذائی قلت ہے وہاں پر اب مسلسل گولہ باری اور بارود سے ماحولیاتی بحران نے بھی سر اٹھا لیا ہے جس سے فلسطینیوں میں مزید خوف و ہراس پھیل گیا ہے۔

انٹرنیشنل میڈیا کے مطابق بلوم برگ نے اپنی رپورٹ میں بتایا کہ غزہ میں جنگ کے باعث ماحولیاتی بحران جنم لے رہا ہے، علاقے میں موجود آلودہ پانی، زہریلی مٹی اور بیماریاں پھیلانے والا کچراجمع ہوگیا ہے۔ رپورٹ میں بتایا گیا ہے کہ غزہ میں پانی کی فراہمی کا واحد ذریعہ آلودگی کے خطرے سے دوچار ہے، 55 ملین ٹن ملبہ، زہریلی دھول اور دھاتی آلودگی مٹی اور پانی میں شامل ہورہی ہے جب کہ جنگ کے بعد سے 84 ہزار کیوبک میٹر سیوریج روزانہ بحیرہ روم میں جا رہا ہے۔

بلوم برگ کی رپورٹ کے مطابق غزہ میں جنگ سے پیدا ہونے والی زہریلی باقیات نسلوں تک اثر انداز ہوں گی کیونکہ غزہ کی 95 فیصدزرعی زمین ناقابل استعمال ہوچکی ہے جس کے سبب خوراک کی قیمتیں آسمان کو چھو رہی ہیں۔ رپورٹ کے مطابق سوک فراس بازار اب 2 لاکھ ٹن کچرے کا ڈھیر بن چکا ہے، 45 فیصد غزہ شہر خالی، سڑکیں تباہ اور کچرا بے قابو ہو رہا ہے جب کہ 350 سے زائد نئے کچرے کے ڈھیر 60 فیصد خیموں اور 15 فیصدپانی کے قریب ہیں۔