انڈونیشیا(مانیٹرنگ ڈیسک) انڈونیشیا نے ٹوکیو کو بڑے محاذ پر شکست دے کر اس سے نمبر ون کی پوزیشن چھین لی ہے ، انڈونیشیا نے ٹوکیو سے کون سی پوزیشن چھین لی؟ تفصیلات سامنے آگئیں۔
انٹرنیشنل میڈیا کے مطابق اقوام متحدہ کی ایک نئی رپورٹ میں بتایا گیا ہے کہ انڈونیشیا کا دارالحکومت جکارتہ اب دنیا کا سب سے بڑا شہر بن گیا ہے جس کی آبادی 4 کروڑ 20 لاکھ تک پہنچ گئی ہے۔ 2000ء میں ٹوکیو دنیا کا سب سے بڑا شہر بنا تھا مگر گزشتہ 25 برسوں کے دوران وہاں آبادی میں اضافے کی شرح گھٹ گئی اور اب وہ پہلے سے تیسرے نمبر پر چلا گیا ہے۔ دوسرے نمبر پر بنگلادیش کا دارالحکومت ڈھاکا ہے جس کی آبادی 3 کروڑ 70 لاکھ ہے۔
انٹرنیشنل میڈیا کے مطابق ٹوکیو کی آبادی ابھی 3 کروڑ 30 لاکھ ہے جبکہ چوتھے اور 5 ویں نمبر پر بھارتی دارالحکومت نئی دہلی اور چین کا شہر شنگھائی ہے جن کی آبادی 3، 3 کروڑ ہے۔چین کا ہی ایک اور شہر گوانگزو چھٹے نمبر پر موجود ہے جس کی آبادی 2 کروڑ 80 لاکھ ہوچکی ہے۔مصر کا شہر قاہرہ 2 کروڑ 60 لاکھ آبادی کے ساتھ 7 ویں نمبر موجود ہے۔فلپائن کا شہر منیلا ڈھائی کروڑ آبادی کے ساتھ 8 ویں، بھارتی شہر کولکتہ 2 کروڑ 30 لاکھ آبادی کے ساتھ 9 ویں جبکہ جنوبی کورین شہر سیئول 2 کروڑ 20 لاکھ آبادی کے ساتھ 10 ویں نمبر پر رہا۔
