وزیراعلیٰ پنجاب مریم نواز نے ستھرا پنجاب پروگرام کے فوری آغاز کا حکم دیدیا

لاہور(کھوج نیوز) وزیراعلیٰ پنجاب مریم نواز کا ایک اور احسن اقدام، پنجاب بھر میں صفائی کے انتظامات کو بہتر سے بہتر بنانے کے لئے ستھرا پنجاب پروگرام کے فوری آغاز کا حکم دے دیا۔

تفصیلات کے مطابق وزیراعلیٰ پنجاب مریم نواز نے ستھرا پنجاب پروگرام کے فوری آغاز کا حکم دیدیا،وزیر اعلیٰ پنجاب مریم نواز کی زیر صدارت خصوصی اجلاس ہوا جس میں ستھرا پنجاب پروگرام، سالڈ ویسٹ مینجمنٹ سروسز کی آؤٹ سورسنگ پر بریفنگ دی گئی۔بریفنگ میں بتایا گیا کہ سرگودھا اور ساہیوال کی سالڈ ویسٹ مینجمنٹ کمپنیاں بھی جلد پوری طرح فنکشنل ہو جائیں گی۔ پنجاب بھرمیں سالڈ ویسٹ مینجمنٹ کیلئے361 نجی کمپنیاں رجوع کر چکی ہیں۔اس موقع پر پنجاب بھر میں صفائی مہم شروع کرنے کا فیصلہ کیا گیا، وزیراعلیٰ نے چھوٹے بڑے شہرو ں کے تمام علاقوں کی یکساں صفائی کی ہدایت کی، اس کے علاوہ انہوں نے نالوں کی صفائی کی ذمہ داری میں کوتاہی نہ برتنے کی بھی ہدایت کی۔ وزیراعلیٰ پنجاب نے کہا کہ اربن، سیمی اربن اور رورل علاقوں کی بھرپور صفائی یقینی بنائی جائے، لاہور اور سرگودھا سمیت متعدد شہروں میں صفائی کی صورتحال تسلی بخش نہیں۔