چیف جسٹس کو قتل کی دھمکیاں، ٹی ایل پی کا نائب امیر گرفتار، 1500کارکنوں کیخلاف مقدمہ درج

لاہور(کھوج نیوز) چیف جسٹس آف پاکستان جسٹس قاضی فائز عیسیٰ کو قتل کی دھمکیاں دینے پر تحریک لبیک پاکستان (ٹی ایل پی) کے نائب امیر کو گرفتار کر کے 1500 کارکنوں کیخلاف مقدمہ درج کرلیا ہے۔

تفصیلات کے مطابق ذرائع نے بتایا ہے کہ چیف جسٹس پاکستان قاضی فائز عیسیٰ کو قتل کی دھمکی دینے پر تحریک لبیک کے نائب امیر پیر ظہیرالحسن شاہ پر مقدمہ درج کیا گیا تھا۔ ٹی ایل پی کے نائب امیر ظہیرالحسن شاہ کو اوکاڑہ سے گرفتار کیا گیا ہے، ظہیرالحسن شاہ اوکاڑہ میں نامعلوم مقام پر چھپے ہوئے تھے۔ لاہور پولیس نے مقدمہ ایس ایچ او حماد حسین کی مدعیت میں تھانہ قلعہ گجر سنگھ میں درج کیا جس میں ٹی ایل پی کے1500 کارکنان کو بھی مقدمے میں نامزد کیا گیا ہے جب کہ مقدمے میں انسداد دہشت گردی ایکٹ، مذہبی منافرت، فساد پھیلانے اور عدلیہ پر دباؤ ڈالنے کی دفعات شامل کی گئی ہیں۔ پولیس کا کہنا ہے کہ پریس کلب کے باہر احتجاج میں پیر ظہیر الحسن نے اعلیٰ عدلیہ کے خلاف نفرت پھیلائی جس پر ٹی ایل پی کے نائب امیر سمیت 1500 کارکنوں پر مقدمہ درج کیا گیا ہے ۔ پولیس کے مطابق مقدمے میں اعلی عدلیہ کودھمکی،کار سرکار میں مداخلت اور قانونی فرائض میں رکاوٹ ڈالنے کی دفعات بھی شامل کی گئی ہیں۔