پاکستان اور ایران نے دہشتگردی کو جڑ سے اکھاڑ پھینکنے کیلئے بڑی حکمت عملی تیار کرلی

اسلام آباد (کھوج نیوز) پاکستان اور ایران نے دہشت گردی کے ناسور کو جڑ سے اکھاڑ پھینکنے کے لئے بڑی حکمت عملی تیار کرلی ہے جس کے بعد دہشتگردوں کی دوڑیں لگ گئی ہیں۔

تفصیلات کے مطابق ایرانی وزیر خارجہ عباس عراقچی کے ساتھ مشترکہ پریس کانفرنس کرتے ہوئے نائب وزیراعظم ووزیر خارجہ اسحاق ڈار کا کہنا تھا کہ ایرانی وزیر خارجہ کو پاکستان میں خوش آمدید کہتے ہیں، مشرق وسطی میں اسرائیلی جارحیت کی شدید مذمت کرتے ہیں۔انہوں نے کہا کہ ایرانی وزیر خارجہ سے خطے کی صورتحال پر گفتگو ہوئی ہے، ہماری بات چیت میں عالمی برادری سے غزہ میں فوری جنگ بندی کا مطالبہ کیا گیا ہے۔انہوں نے کہا کہ اسرائیلی حملے ایران کی خودمختاری کی سنگین خلاف ورزی ہیں۔ اسحاق ڈار نے بتایا کہ ملاقات میں سرحدی امور اور مشترکہ چیلنجز سے نمٹنے پر اتفاق کیا گیا ہے۔ انہوں نے کہا کہ دہشت گردی کے ذریعے خودارادیت کو ختم نہیں کیا جا سکتاہے، مسئلہ کشمیر کو بھی پرامن انداز میں حل کرنے کی ضرورت ہے۔انہوں نے کہا کہ اسرائیلی کارروائیاں عالمی و انسانی حقوق کی کھلی خلاف ورزی ہیں،پاکستان اور ایران مشرق وسطی میں کشیدگی کے خاتمے سمیت مذاکرات کی ضرورت پر زور دیتے ہیں۔ اس موقع پر ایرانی وزیر خارجہ عباس عراقچی نے کہا کہ دہشت گردی پاکستان اور ایران دونوں ملکوں کیلئے مشترکہ چیلنج ہے۔انہوں نے کہا کہ پاکستان کا مسئلہ فلسطین پر واضح اور دو ٹوک موقف ہے، اقوام عالم فلسطین میں جاری نسل کشی رکوانے میں ناکام رہیں۔ انہوں نے کہا کہ خطے میں اسرائیلی جارحیت کے خاتمے کیلئے اجتماعی کاوشیں درکار ہیں، پاکستان فلسطینی و لبنانی مہاجرین کی انسانی بنیادوں پر مدد کررہا ہے۔